न्हूगु बसपार्कय् हाकनं मेगु सिन्डीकेट

येँ – सार्वजनिक यातायातय् सिन्डीकेट (एकाधिकार) त्वाःथलेत जूगु सहमति पुलां जुइ मलाःनिवं हाकनं मेगु सिन्डीकेट शुरु जूगु दु । स्वनिगलं पिहां वनीगु सवारी साधन संचालन जुइगु मुख्य केन्द्र थनया न्हूगु बसपार्कय् मेगु सिन्डीकेट खने दुगु खः ।
न्हूगु बसपार्कय् स्वनिगलं पिहां वनीगु यातायात टिकट काउन्टरय् न्हूगु बसपार्कया व्यवस्थापनया अधिकार कयातःगु ल्होत्से बहुउद्देश्यीय संस्थाया एकाधिकार शुरु जूगु खः ।

ल्होत्सेया एकाधिकारया कारणं यात्रुतय्सं सास्ति फयेमाःगु खँ सीदुगु दु । थ्व स्वयां न्ह्यः यातायात समितिं टिकट काउन्टर चायेकाः टिकट कायेमाःगु व्यवस्था जुया वयाच्वंगु खःसा यातायातय् सिन्डीकेट त्वाःथलेत यातायात व्यवसायी सहमत जूगु छन्हु लिपा हे ल्होत्सें जक टिकट कायेगु यानाहःगु खः ।

२०५७ सालय् ल्होत्सें ४५ दँया निंतिं न्हूगु बसपार्क व्यवस्थापन यायेगु जिम्मेवारी काःगु खः । व्यवस्थापनया जिम्मेवारीकथं येँ महानगरपालिकां ल्होत्सेयात बसपार्क लागाया सुचुकुचु यायेगु लगायतया व्यवस्थापन यायेगु जिम्मेवारी बिउगु खः ।
ल्होत्सें जक टिकट कायेगु यायेवं थुगु ज्या याये मदइगु येँ महानगरपालिकाया प्रवक्ता ज्ञानेन्द्र कार्कीं धयादीगु दु ।

वय्कलं धयादी, ‘येँ मनपालिसे जूगु सम्झौताकथं ल्होत्सें टिकट काटे याये दइ धइगु खँ न्ह्यथनातःगु मदु । यात्रुलिसें टिकट काटे यानाः अप्वः ध्यबा काःगु जुल धाःसा उकियात तत्काल बन्द याकेगु जुइ ।’ल्होत्सें क्वःछिनातःगु भाः स्वयां ३ प्रतिशत अप्वः भाडा कायेगु यानाच्वंगु यातायात सुधारया पक्षय् ज्या याना वयाच्वनादीइम्ह रामबहादुर थापां कनादीगु दु । यातायात व्यवसायीतय्सं दक्वं ज्याया व्यवस्थापन यायेगु जिम्मा सरकारया हे जूगु धया वयाच्वंगु दु ।

सम्बन्धित बुखँ

LEAVE YOUR COMMENTS