कलेज विद्यार्थीतय् दथुइ नसाज्वलं दयेकेगु कासा

येँ – थीथी कलेजया विद्यार्थीतय् दथुइ अनेकथंया कासात जुया वयाच्वंगु झ्वलय् आः नसाज्वलं दयेकेगु धेंधेंबल्लाः कासा नं जुइगु जूगु दु । थीथी कलेजया विद्यार्थीतय् दथुइ नेपाली नापं विदेशी नसाज्वलं दयेकेगु उकथंया धेंधेंबल्लाः स्नेहा ट्राभल्स मिडिया व नेपाल युनिक ट्यालेन्टया मंकाः ग्वसालय् जुइत्यंगु खः ।

‘कलेज सेफ आइकन–२०१८’या नामं न्हापांखुसी जुइत्यंगु उगु कासा थ्व हे वइगु जेठया १५ निसें असार ३० तक जुइ । थन छगू पत्रकार सम्मेलन यासें बिउगु जानकारी कथं नेपाली व विदेशी नसाज्वलं दयेकेत ब्वति काइगु प्रत्येक कलेजं स्वम्ह विद्यार्थीयात प्रतियोगीया रुपय् दुथ्याकीगु जूगु दु ।

कासाय् स्वनिगः दुने व पिनेया करिब २० गू कलेजं ब्वति काइगु अनुमान ग्वसाः खलकं याःगु दु । कासाय् नेपाली हेरिटेज नसा, आदिवासी जनजातिया नसा, कन्टिनेन्टल व इटालियन, भारतीय, चाइनिज नसाज्वलं दयेकेगु धेंधेंबल्लाः जुइगु पत्रकार सम्मेलनय् जानकारी बिउगु दु ।

कासाया निर्णय यायेगु निंतिं नेपाःया प्रतिष्ठित होलतया सेफयात ल्यःगु दु । निर्णायकमण्डलय् सूर्यकिरण श्रेष्ठ, लक्ष्मणप्रसाद भण्डारी, डा. संजय जम्मल थेंज्याःपिं प्रतिष्ठित सेफ दुथ्यानाच्वंगु दु ।

सम्बन्धित बुखँ

LEAVE YOUR COMMENTS