शिक्षाया ज्याझ्वःयात गृहया अख्तियारी

चालु आर्थिक दँया शिक्षा सम्बन्धी जिल्लागत ज्याझ्वःया अख्तियारी जिल्ला प्रशासन ज्याकूयात बिउगु दु । जिल्ला शिक्षा ज्याकू खारेज जुयाः जिल्ला प्रशासन ज्याकू मातहतया शिक्षा विकास व समन्वय इकाइ गठन जुइवं उगु ज्याझ्वःया अख्तियारी गृह मन्त्रालय अन्तर्गतया जिल्ला प्रशासन ज्याकू (जिप्रका)यात बिउगु खः ।

संविधानं हे विद्यालय तहतकया शिक्षाया व्यवस्थापन व संचालनया अधिकार स्थानीय तहयात बी धुंकूगु अवस्थाय् साविकया जिल्ला शिक्षा ज्याकू स्थानीय स्वायत्त शासन ऐन २०७४ कथं वंगु चैत २८ गतेनिसें हे लागू जुइकथं खारेज जुइधुंकूगु दु । मन्त्रिपरिषदया वंगु चैत २७ गतेया निर्णयकथं उगु इकाइ गठन याःगु खः ।

साविकया जिल्ला शिक्षा अधिकारीतय्सं इकाइ प्रमुखया रुपय् ज्या यायेकथं मन्त्रिपरिषद्या वंगु बैशाख ४ गतेया बैठकं अन्तरिक संगठन संरचना स्वीकृत यायेगु नापं दरबन्दी स्वीकार याःगु खः। उगु निर्णय कार्यान्वयन यायेत धासें शिक्षा, विज्ञान व प्रविधि मन्त्रालयं साविकया शिक्षा ज्याकूयात पत्राचार यायेवं उगु ज्याकुथिं ‘नेपाल सरकार, गृह मन्त्रालय जिल्ला प्रशासन ज्याकू, विकास तथा समन्वय इकाइ’या नामय् साइनबोर्ड व छाप दयेकेगु शुरु याःगु दु ।

थः हे ज्याकू प्रमुख जुयाः ज्या याःपिं शिक्षा सेवाया अधिकारीं प्रशासनया सेवाया प्रमुख जिल्ला अधिकारीं तजबिजीया अधिकार प्रत्यायोजन (अख्तियारी) बिउगु आधारय् बजेट व कार्यक्रम संचालन नीतिगत निर्णय यायेमाःगु जुइवं असहजता महसुस याःगु दु ।

शिक्षा, विज्ञान व प्रविधि मन्त्रलयया सचिव खगराज बरालं संविधानया मर्म व मन्त्रिपरिषद्या निर्णयकथं जिल्ला शिक्षा ज्याकू खारेज जूगुलिं व चालु आर्थिक दँया ल्यं दुगु ज्याझ्वः जिप्रका थः हे वा वयागु अख्तियारीया आधारय् शिक्षा इकाइं संचालन यायेकथं परिपत्र यानागु धयादिल । गृह मन्त्रालयं नं व हे कथं परिपत्र छ्वयेगु क्रम शुरु जूगुलिं प्रमुख जिल्ला अधिकारीं खटे याःकथं शिक्षा इकाइं ज्या यायेमाःगु जुइ ।

प्रमुख जिल्ला अधिकारीं दक्वं ज्या थःगु प्रत्यक्ष निर्देशनय् यायेगु वा इकाइ प्रमुखयात पूर्ण अख्तियारी बीगु धइगु खँय् धाःसा जिल्लाकथं बिस्कं बिस्कं अभ्यास नं जुइफु । तर जवाफदेहिता, लेखा परीक्षण व च्वय्या निकायय् प्रतिवेदन छ्वयेगु ज्या धाःसा प्रमुख अधिकारीया हे जुइ ।

शिक्षामन्त्री गिरिराजमणि पोखरेलं शिक्षाया ज्याझ्वः संचालन यायेबलय् व अख्तियारीया सम्बन्धय् छुं नं समस्या वल धाःसा गृह मन्त्रालयलिसें माःगु समन्वय यायेगु आश्वासन शिक्षा प्रमुखयात बिया वयाच्वनादीगु दु । चालु आर्थिक दँय् विद्यालयया शिक्षकया तलब, विद्यार्थीतय् छात्रवृत्ति व निःशुल्क पाठ्य सफूया ध्यबा जक स्थानीय तहय् वंगु दुसा विद्यालय क्षेत्र विकास ज्याझ्वः लगायत शैक्षिक विकास व मेमेगु ज्या इकाइ (थ्व स्वयां न्ह्यःया शिक्षा ज्याकू)याके हे दु ।

माध्यमिक शिक्षा परीक्षा (एसइईं) कक्षा १०या परीक्षा उत्तरपुस्तिका सम्परीक्षण तत्काल यायेमाःगु व जिल्ला परीक्षा समन्वय समितिया संयोजक प्रमुख जिल्ला अधिकारी जुइगु जूगुलिं आःयात प्रशासन ज्याकू मातहतया इकाइ तयागु शिक्षा मन्त्रालयं न्ह्यथंगु दु ।

येँ जिल्लाया प्रमुख जिल्ला अधिकारी केदारनाथ शर्मां मन्त्रालयपाखें परिपत्र वःगुलिं शिक्षा सम्बन्धी ज्याया समन्वय व व्यवस्थापनया निंतिं थःपिंसं याकनं छगू निर्णय काइगु जूगुलिं ज्या यायेत छुं कथंया नं समस्या वइमखु धयादिल ।

सम्बन्धित बुखँ

LEAVE YOUR COMMENTS