प्रिज्म सहकारी स्थापना दिवसय् निःशुल्क स्वास्थ्य शिविर

थिमि – प्रिज्म बचत तथा ऋण सहकारी संस्थाया खुक्वःगु स्थापना दिवसया लसताय् छगू निःशुल्क स्वास्थ्य शिविर जुल । थनया आदर्श माध्यमिक विद्यालय् लाय्कुलिइ जूगु निःशुल्क स्वास्थ्य शिविरय् थीथी ल्वय्या परीक्षण याःगु खः ।
जनसमुदायय् मिसातय्त जुइगु म्हुतुया क्यान्सर, मुटु ल्वय्, चिनी ल्वय्या नापं खैया परीक्षण यायेगुयालिसें थीथी सामान्य ल्वय्या नं परीक्षण यायेगु ज्या जूगु संस्थाया अध्यक्ष प्रेमकाजी श्रेष्ठं कनादिल ।

स्वास्थ्य शिविरय् मिसातय्त जुइगु म्हुतुया क्यान्सरय् ५५, मुटु ल्वय्या परीक्षणय् १०५, चिनी ल्वय्या परीक्षणय् १०४, खै परीक्षणय् ५२ व सामान्यल्वय्या परीक्षणय् ४४ म्ह मिसा व मिजं यानाः ३६० म्हेसिया स्वास्थ्य परीक्षण याकूगु खः ।

संस्थाया खुक्वःगु वार्षिकोत्सवया लसताय् जूगु नेपाल क्षयरोग निवारण संस्था, वासुदेव प्रसाद जोशी स्मृति प्रतिष्ठान व नेपाल परिवार नियोजन संघ स्वनिगः शाखाया मंकाः सहकार्यय् उगु स्वास्थ्य शिविर जूगु जानकारी नेपाल क्षयरोग निवारण संघ ख्वप शाखाया निवर्तमान सभापति बाबुकाजी श्रेष्ठं जानकारी बियादीगु दु ।

उगु इलय् स्वास्थ्य शिविरय् थीथी ल्वय्या परीक्षण यायेगु नापनापं निःशुल्क रुपं वासः नं इनेज्या याःगु खःसा नापं ईसीजी सेवा तकं उपलब्ध याकेगु ज्या जूगु संस्थाया प्रबन्धक राजु वज्राचार्यं कनादिल ।

सम्बन्धित बुखँ

LEAVE YOUR COMMENTS