प्रदेश प्रमुख मदयाः चुनाव याये थाकुल
येँ – सरकारं प्रदेश प्रमुख नियुक्त यायेगु ज्या लिबाका च्वंगुलिं राष्ट्रिय सभाया चुनाव तकं लिछ्याये मालीगु अवस्था वयेत्यंग’ु दु । निर्वाचन आयोगं तुरुन्त प्रदेश प्रमुख नियुक्त मयात धाःसा माघ २४ गते क्वःछिनातःकथं राष्ट्रिय सभाया चुनाव याये मफइगु खँ धयाहःगु दु । तर प्रधानमन्त्री शेरबहादुर देउवां धाःसा प्रदेश प्रमुख ल्ययेगु ज्याय् अलमल यानाच्वंगु दु । प्रधानमन्त्री देउवां प्रदेश प्रमुख ल्ययेत च्वनीगु मन्त्रिपरिषद् बैठक हे तःक्वः लिछ्यायेधुंकूगु दु ।
प्रदेशसभाया सदस्यतय्सं शपथ ग्रहण यायेधुंकल धायेवं जक राष्ट्रिय सभाय् मतदान याये खनी । प्रदेश सभा सदस्यतय्त शपथ नकेगु ज्या धाःसा प्रदेश प्रमुखं यायेमाः । उकिं इलय् हे प्रदेश प्रमुख नियुक्त यानाः शपथ नकेगु ज्या मजुल धाःसा राष्ट्रिय सभाया निर्वाचन तकं लिछ्याये मालीगु खँ निर्वाचन आयोगया प्रवक्तां धाःगु दु ।
निर्वाचन आयोगं राष्ट्रिय सभा निर्वाचनया निंतिं माघ ७ गते मतदाता नामावली प्रकाशन यायेगु धलः दयेकातःगु दु । तर सरकारं प्रदेश प्रमुख नियुक्त मयाःगुलिं आयोगं प्रदेश सभाय् ल्यःपिं समानुपातिक सांसदतय् नांधलः तकं पित बी फुगु मदुनि । राष्ट्रिय सभाया निर्वाचनय् समानुपातिक सांसदतय्सं नं मतदान याये खनी । राष्ट्रिय सभा निर्वाचनय् मतदान याये दुपिं २०५६ म्ह मध्ये प्रदेश सभाया समानुपातिक व प्रत्यक्ष निर्वाचित सांसदत जक ५५० म्ह दु ।
प्रदेश प्रमुखं शपथ कायेकेधुंकल कि जक निर्वाचित जूपिं सांसदतय् कानुनी हैसियत दइ । निर्वाचन आयोगं प्रदेश प्रमुख नियुक्त यानाः वयागु थःगु हे शपथ ग्रहण याकेगु व पदभार लःल्हायेगु ज्या लिसें प्रदेश सभा सदस्यतय् शपथ ग्रहण तकं कंस माघ ४ गते तकया दुने सिधयेकेमाः धयाच्वंगु दु । आयोगया प्रवक्ता नवराज ढकालं माघ ७ गते दुने आयोगं मतदाता धलः पिकाये मफुत धाःसा राष्ट्रिय सभाया निर्वाचन हे प्रभावित जुइगु खँ धयादीगु दु ।
‘उकिं गुलि फु उलि याकनं प्रदेश प्रमुख नियुक्त याये हथाय् जुइधुंकूगु दु,’ वय्कलं धयादिल ।आयोगं राष्ट्रिय सभा निर्वाचनया ज्याझ्वः चीहाकः यानाः निर्वाचन याये मफइगु खँ नं स्पष्ट याःगु दु । प्रवक्ता ढकालं धयादीगु दु, ‘नांधलः सार्वजनिक यायेगु, दावी विरोध यायेगु लगायतया फुक्क ज्याया निर्वाचन तालिका कानूनय् हे न्ह्यथनातःगु दु । आः दयेकागु कार्यतालिकाय् थप ई तयातयागु मदु । उकिं तालिका चीहाकः यानाः निर्वाचन याये फइ मखु ।’राष्ट्रिय सभा निर्वाचनय् ब्वति कायेगु निंतिं राष्ट्रिय सभाय् दर्ता दुपिं २७ गू दलतय्सं निर्वाचनया निंतिं आन्तरिक तयारी धाःसा यानाच्वंगु दु ।
LEAVE YOUR COMMENTS