अमेरिकाया बोस्टनय् नेवाः न्ह्यलुवाः

येँ – नेवाः अर्गनाइजेसन अफ न्यू इंल्याण्ड, बोस्टन, अमेरिकापाखें च्वमि मय्जु प्रेमहिरा तुलाधरया नेवाः न्ह्यलुवाः सफू पिदन । वंगु ने.सं. ११३८ बछलागा खस्थिकुन्हु जूगु छगू ज्याझ्वःया दथुइ उगु सफू लुम्बिनी बौद्ध विश्वविद्यालयया उपकुलपति प्रा. डा. नरेशमान वज्राचार्यं पितब्वज्या यानादीगु खः ।

अर्गनाइजेसनया निवर्तमान नायः महेन्द्र शाक्यया सभापतित्वय् जूगु ज्याझ्वलय् अर्गनाइजेसनया न्वकु मबि सिंहं लसकुस यासे पितब्वज्या जूगु सफूया समीक्षा नं यानादीगु खः ।

अर्गनाइजेसनया छ्यांजे समन्त वज्राचार्य, प्राध्यापक निर्मलमान तुलाधरं सफूया थीथी पक्षयात कयाः थःगु नुगःखँ तयादीगु खः । संस्थाया न्हापांगु पलाःकथं पिदंगु उगु सफुतिइ नेपालभाषा च्वन्ह्याकेत योगदान बिया वंपिं नेपालभाषा साहित्य ख्यःया च्याम्ह न्ह्यलुवापिनिगु जीवनी दुथ्याःगु सफूया च्वमि नापं सह प्राध्यापक तुलाधरं कनादीगु दु ।