पहिचान मदयाः कामत जाति अलपत्र

येँ – थःगु जातिया पहिचान स्पष्ट मजुल धाःसा छु समस्या वइ धइगु खँ नेपाःया हे कामत समुदाययात जुयाच्वंगु पीडायात स्वल धाःसा अझ स्पष्ट जुइ । बाग्लुङया ढोरपाटन लागाय् च्वनीपिं अतिकं अल्पसंख्यक समुदाय खः कामत जाति । उगु लागाय् थुमिगु ६० खा ति छेँ दु, जनसंख्या धाःसा ३५० ति हे जक दइ ।

तर समस्या छु धाःसां थुपिं राज्यपाखें यानातःगु थीथी जातिया वर्गीकरणय् छुं हे वर्ग दुने मलाः । थुपिं ब्रम्हू क्षेत्री नं मखु, जनजाति नं मखु, दलित नं मखु । छुं हे वर्गय् दुमथ्याःगु जुयाः उगु वर्गयात राज्यपाखें बियातःगु छुं हे कथंया सुविधा नं थुमिसं उपभोग याये मखं ।

नेपालय् दु धयातःगु १२५ जाति मध्ये ०.०५ प्रतिशत स्वयां कम दुगु समुदाययात ‘अल्पसंख्यक समुदाय’ धकाः परिभाषित यानातःगु दु । तर थुपिं आः थ्व अल्पसंख्यक दुने तकं लाये फुगु मदुनि । थःपिं वास्तवय् बिस्कं समुदाययापिं खः धकाः छुं हे पहिचान क्यने मफुगु कारणं थुपिं छुं हे वर्गय् दुथ्याये मफयाच्वंगु खः ।

शिक्षा, रोजगारी आदि थेंज्याःगु ख्यलय् दरखास्त तयेमाःसा न्ह्याबलें खुल्लापाखे वने माःगु जुयाः प्रतिस्पर्धा याये मफयाच्वंगु खँ उगु समुदायया ल्याय्म्हतय्सं कनेगु याः । थःपिंत न्ह्यागुसां छगू वर्ग दुने दुथ्याका बी माल धकाः थीथी सरकारी निकायय् धाः वंसां सुनां नं वास्ता मयाःगु गुनासो उमिगु दु ।

अलग्ग समुदायया छुं हे पहिचान मदुगु जुयाः उमित छु वर्गय् तयेगु धकाः हे धाये मफुगु खँ धाःगु दु । आः उमित पहिचान खुले यानाः न्ह्यागुसां वर्गय् तयेगु लागिं स्थानीय नगरपालिकां पहल यानाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS