यातायातय् सिन्डिकेट अन्त जुइगु, व्यवसायी व सरकार दथुइ सहमति

येँ – यातायात क्षेत्रय् दयाच्वंगु सिन्डिकेट आः आधिकारिक रुपं क्वचाइगु जूगु दु । आइतवाः लिबाक्क तक सरकार व यातायात व्यवसायीतय् दथुइ जूगु बैठकय् व्यवसायीत आन्दोलनया फुक्कं ज्याझ्वः दिकाः कम्पनीइ वनेत तयार जुइवं यातायात ख्यलय् दयाच्वंगु सिन्डेकटया अन्त्य जुइगु जूगु खः । सरकार व यातायात व्यवसायीं सोमवाः मंकाः प्रेस सम्मेलन यानाः निगू पक्ष दथुइ जूगु सहमतिया जानकारी बीत्यंगु दु ।

आइतवाः बहनीतक जूगु बैठकय् यातायात व्यवसायीतय्सं आन्दोलन दिकाः कम्पनीइ वनेत सहमति प्वंकूगु खः । थ्वयां न्ह्यव यातायात व्यवसायीतय्सं सिन्डिकेट अन्त्य यायेगु सरकारया निर्णयया विरोधय् वइगु २७ गते निसें अनिश्चितकालिन यातायात बन्द यायेगु घोषणा यानातःगु खः । थ्व झ्वलय् शुक्रवाः २१ गते छन्हु यातायात बन्द नं याःगु खः ।

तर सिन्डिकेट चिइकां त्वःतेगु अठोट यानाः न्ह्यावःगु सरकारं शुक्रवाः जूगु बन्द लिपा यातायात व्यवसायी महासंघया पदाधिकारीतय्त धमाधम ज्वनेगु सुरु याःगु खः । थुकिया लिसें सरकारं बन्दया समर्थन यानाः गाडी चले मयाःपिनि रुट परमिट हे खारेज यायेगु सुरु यायेवं व्यवसायीत सहमतिइ वयेत बाध्य जूगु खः । शनिवाः गृहमन्त्री रामबहादुर थापाया आदेशय् महासंघया अध्यक्ष योगेन्द्रमान कर्माचार्य लिसें न्याम्ह पदाधिकारीतय्त ज्वंगु खः । वय्कःपिंत नं सरकारं सिन्डिकेट मयायेगु व कम्पनीइ वनेगु सहमतिया भ्वं याकाः आइतवाः जक त्वःतूगु खः ।

सम्बन्धित बुखँ

LEAVE YOUR COMMENTS