विश्वकप २०१८

बलात्कृततय्त विशेष व्यवस्था माग

जनयुद्धय् यौन हिंसाया शिकार जूपिं पीडिततय् बिस्कं दुःख
येँ –  माओवादीं न्ह्याकूगु झिदँ ताःहाकःगु जनयुद्धया झ्वलय् विद्रोही व सरकारी पक्षं याःगु बलात्कारया शिकार जूपिं मिसा व मस्तय्त राज्यपाखें विशेष रुपं स्वयाः क्षतिपूर्ति व परिपूरणया व्यवस्था जुइमाःगु माग पीडिततय्सं याःगु दु । द्वन्द्वया इलय् सीपिं, घाःपाः जूपिं व बेपत्ता जूपिनि बारे जक राज्यया ध्यान वनाच्वंगु खँय् थःपिनि चिउताः प्वंकुसें पीडिततय्सं बलात्कार लगायत मेमेगु यौनहिंसाया शिकार जूपिं मिसापिनि बारे विशेष रुपं व्यवहार जुइमाःगु माग नं उमिसं याःगु दु ।

पीडिततय्सं थ्व खँया माग यासें सरकारयात आः नकतिनि छगू ज्ञापन पौ नं लःल्हाःगु दु । द्वन्द्वया इलय् विद्रोही व सरकारी पक्षपाखें गुलि मिस्त बलात्कारया शिकार जुल धइगु यकिन तथ्यांक आः तक वःगु मदुनि । बलात्कार थेंज्याःगु जघन्य अपराध याःपिंत क्षमा बी मफइगु खँ सत्य निरुपण आयोगं धाःगु दुसां बलात्कारं पीडित जूपिंत छु व्यवस्था यायेगु धइगु खँ धाःसा गनं उल्लेख जुयाच्वंगु मदु ।

पीडिततय्सं धाःकथं पीडित जूपिं गुलिखे मिस्त थौं तक शारीरिक रुपं तकं अशक्त जुयाच्वंगु दु । उमिगु लागिं राज्यं बांलाःगु व्यवस्था यायेमाः । गुलिं मानसिक रुपं विक्षिप्त जुयाच्वंगु दु । गुलिं समाजय् पुनस्र्थापित जुइ मखनाः अलपत्र अवस्थाय् लानाच्वंगु दु । उमिगु बारे छु यायेगु धकाः आः तक छुं नीति वःगु मदुनि ।

उकिं उमित जीवन यापनया लागिं आवश्यक व्यवस्था यायेगु, समाजय् पुनस्र्थापित यायेगु, रोजगारीया व्यवस्था यानाः परिपूरण यायेगु कार्यक्रम हयेमाः धइगु नं उमिगु माग दु । अथे हे जनयुद्धया इलय् बाल सैनिकया रुपय् ज्या यानाच्वंपिं आपालं मस्त नं आः तःधिकः जुइधुंकाः अलपत्र जुयाच्वंगु खँ पीडिततय्सं धाःगु दु । अबलेयापिं थ्व बाल सैनिकतय्त आः तक पुनस्र्थापना मयाःनिगु कारणं उमिगु जीवन समेत अन्यौलग्रस्त जुयाच्वंगुलिं उमिगु बारे नं विशेष व्यवस्था जुइमाःगु खँ धाःगु दु ।

आयोगय् ६० हजार उजुरी
जनयुद्धया इलय् जूगु ज्यादति व हत्या बेपत्ता बारे छानबिन यायेत सरकारं गठन याःगु सत्य निरुपण व बेपत्ता छानबिन निगुलिं आयोगं बांलाक ज्या मयाःगु द्वपं पीडिततय्सं बिउगु दु । थ्व निगुलिं आयोगय् थौंकन्हय् ६० हजार गू उजुरी दर्ता जुयाच्वंगु दु ।

तर आयोगं थुकी मध्ये छुं मुद्दाया प्रारम्भिक छानबिन याःसां किनारा धाःसा छगू हे याःगु मदुनि । मुद्दा किनारा यायेत कानून प्रयाप्त मजूगु खँ आयोगया पदाधिकारीतय्सं धयाच्वंगु दु । आयोग पदाधिकारीतय्सं थुकिया लागिं सरकारयात इनाप याःसां सरकारं धाःसा चिउताः मतःगु द्वपं बियाच्वंगु दु ।

सम्बन्धित बुखँ

LEAVE YOUR COMMENTS