‘दत्यां हे सम्पूर्ण त्रिपिटक पिहां वइगु स्थिति दु’

बुद्ध धर्मया प्रमुख ग्रन्थ त्रिपिटकया सम्पूर्ण भाग नेपालभाषां अनुवाद यानाः पिकायेगु अनुष्ठान हे यानाः सक्रिय जुया च्वनादीम्ह बौद्ध विद्वान भाजु दुण्डबहादुर वज्राचार्यलिसे त्रिपिटक व उकिया नेपालभाषा अनुवाद बारे यानागु बःचाधंगु खँल्हाबल्हा :

त्रिपिटकया नेपालभाषा अनुवाद ज्याखँ थौंकन्हय् गथे जुयाच्वन ?
ज्या ला न्ह्याना हे च्वंगु दु । थुथाय् भचा सुस्त जुयाच्वन तर दिउगु मदुनि । वि.सं. २०६६ सालय् भिक्षु कोण्डन्यया अध्यक्षताय् ‘त्रिपिटक अनुवाद मण्डल’ धकाः पाली व नेपालभाषा सःपिं विज्ञतय्गु छगू पुचः हे गठन यानाः थ्व ज्या न्ह्याकागु खः । सम्पूर्ण त्रिपिटकया स्वब्वय् निब्व आः तक सिधल धाःसां जिल । सम्पूर्ण त्रिपिटक धायेबलय् करिब १७ हजार पेज दइ ।

सुस्त जुयाच्वंगु छाय् थें ?
खास कारण ला मदु । अनुवाद ज्याया जिम्मा कयातःपिं निम्ह स्वम्हेसिया ज्या सिमधःगुलिं सुस्त जूगु खः । यदि वय्कःपिंसं थःथःगु भागया ज्या पूवंकादिल धाःसा दछि दत्याया दुने हे सम्पूर्ण त्रिपिटक नेपालभाषां पिहां वइ । तयार जक याना बिउ, पिकायेगु सम्पूर्ण भाला जिमिगु वीर–पूर्ण पुस्तक संग्रहालययागु जुइ धकाः बचं हे बियातयागु दु ।

त्रिपिटक नेपालभाषां पिहां वयाः जुइगु फाइदा जुइ ?
छगू ला धार्मिक रुपं यक्व फाइदा जुइ । छाय्धाःसां आः बुद्धया विशुद्ध धर्म सयेके सीकेया लागिं पाली भाय् वा मेपिंसं च्वयातःगु सफू ब्वनाच्वने म्वाःल । तप्यंक हे मूल श्रोतय् तक झीगु पहुँच दत । मेगु खँ, थुकिं झीगु मांभाय् नेपालभाषायात अतिकं तःमि याना बी । छुं जुयाः नेपालभाषा लोप हे जुयावन धाःसां नं त्रिपिटकं उकियात हानं म्वाका बी ।

थ्व दावी झीसं यायेफु । तर त्रिपिटक धइगु विदेशय् स्वयां न्हापां नेपालय् दुगु कृति खः । ओस्कार भी. हिनुभर धाःम्ह छम्ह विद्वानं पाली त्रिपिटकया दकलय् पुलांगु ग्रन्थ नेपालय् दु धकाः सफू हे च्वयादीगु दु । उगु त्रिपिटकया छुं अंश झीगु राष्ट्रिय अभिलेखायय् अझं सुरक्षित दनि ।

मेगु छु छु भाषाय् त्रिपिटक अनुवाद जुइधुंकल ले ?
त्रिपिटक मूल रुपं च्वयातःगु ला पाली भासं खः । तर वर्मिज, थाई, श्रीलंकन थेंज्याःगु बौद्ध देशया भाषाय् तकं सम्पूर्ण त्रिपिटक अनुवाद मजूनि । कम्बोडियाया कम्बोज भाषाय् पूर्ण त्रिपिटक दुगु खनेदु, तर व पिहां मवःनि । झीसं कन्हय् पिकायेत्यनागु ‘यमक’ (थुकी स्वब्व दु) धाःगु सफूया न्हापांगु ब्व तिनि आः नकतिनि अंग्रेजी भासं पिहां वइन धकाः विज्ञापन वयाच्वंगु जिं ब्वना ।

धायेबलय् त्रिपिटक पूर्ण रुपं अनुवाद जूगु नेपालभाषा हे न्हापांगु भाय् जुइ लाकि छु ?
जुइफु । दावी हे यानाः धायेत अध्ययन याये मगाःनि । अथे खःसां थ्व सम्भावना मदु धाये फइ मखु । थ्व झीगु लागिं गौरवया खँ खः ।

थःगु हे भासं त्रिपिटक मदयाः बुद्ध धर्मयात छुं लिच्वः लानाच्वंगु खंकादिया ला ?
पूवंक त्रिपिटक ब्वनातःपिं ला तसकं कम । छाय्धाःसां त्रिपिटक पाली भाषाय् जक दु । ब्वनेगु खःसा दकलय् न्हापां पालि निं सयेके माल । त्रिपिटक ब्वनेगु ज्या मजूगुलिं झीगु धर्म हे औपचारिक थें जक जुयाच्वन । गुरुं धाःगु, भन्तेनं धाःगु, गुरुमांनं धाःगु धकाः खालि धाःगु खँया भरय् बुद्ध धर्म चले जुयाच्वन ।

आः तप्यंक हे धर्मय् प्रवेश याये खनीगु अवस्था वःगु दु । त्रिपिटक धइगु ला बुद्धं गथे धाल अथे हे च्वयातःगु सफू खः । थ्व ब्वनेगु धइगु तप्यंक हे बुद्धया न्ह्यःने च्वनाः प्रवचन न्यने थें खः ।

थज्याःगु ग्रन्थ अनुवाद यायेगु ज्याय् छि गय यानाः लानादिल ?
नेपालभाषाय् त्रिपिटक अनुवाद जुयाः पिहां वःगु च्यागू दशक ति दइन । डा. इन्द्रमान वैद्यं ‘धम्मपद’ अनुवाद यानाः थ्व ज्याया शुभारम्भ यानादीगु खः । दथइ अमृतानन्द भन्ते लगायत मेपिंसं नं भचा भचा ज्या यानातःगु दु । थनिं पीदँ न्ह्यः ‘इति उत्तक’ धाःगु सफू अनुवाद यानाः जि नं थ्व ख्यलय् दुहां वयागु खः ।

थौंकन्हय् चाहिँ जि पूर्ण रुपं थ्वहे ज्याय् लगे जुयाच्वनागु दु । जिमि बाः पूर्णबहादुर वज्राचार्य नं बुद्ध धर्मय् यक्वं सक्रिय जुयादीम्ह खः । जितः थ्व ज्याय् वनेत तःधंगु हःपाः बियाबिज्याःम्ह सुदर्शन भन्ते खः । वसपोल छम्ह मदयाः जितः याकःचां थ्व ज्या याये मालाच्वंगु दु ।

न्ह्यब्व:म्ह : सुरेश मानन्धर

सम्बन्धित बुखँ

LEAVE YOUR COMMENTS