बिहीवाः बुंगद्यःया साइत स्वइगु

येँ – यलया थति त्वालय् तयातःम्ह बुंगद्यः सालेगु निंतिं कन्हय् बिहीवाः साइत स्वइगु जूगु दु । मंगःया भिंद्यः न्ह्यःने च्वंगु मन्डप फल्चाय् च्वनाः उगु साइत स्वइगु खँ दैवज्ञ ज्योतिष कीर्तिमदन जोशीं ‘नेपालभाषा टाइम्स’ लिसें खँ ल्हायेगु झ्वलय् कनादीगु दु । बिहीवाः सुथय् ८ बजे साइत स्वयेगु ज्या जुइगु जानकारी नं वय्कलं बियादीगु दु ।

न्हापा जूसा प्यम्ह ज्योतिषपिं च्वनाः साइत स्वइगु खःसा आः निम्ह जक ज्योतिष च्वनाः साइत स्वइगु खँ नं वय्कलं कनादिल । थुगुसी साइत स्वयेगु निंतिं कीर्तिकिरण जोशी व पूर्णमंगल जोशी च्वनादी । वय्कःया कथं बुंगद्यःया साइत दँय् निकः स्वयेगु याना वयाच्वंगु दु । छकः बुंगं द्यःयात यलय् हइगु इलय् व छक्वः नैंक्यालं लुइधुंकाः साइत स्वयेगु याइ ।

थुगुसी मलमास लाःगुलिं यानाः बुंगद्यः सालेगु साइत न्हापा नं लायेफु वा लिबायेफुगु खँ नं वय्कलं कनादीगु दु । साइत स्वयेगु इलय् सर्वसाधारणया लिसें गुथि संस्थानया प्रतिनिधि नं दुथ्याइगु खँ धाःगु दु । साइत चूलायेवं बुंगद्यःयात लगंख्यलं सालाः जावलाख्यः थ्यंगुयां प्यन्हु कुन्हु भोटो जात्रा याइ । उगु भोटो जात्रा स्वयेगु निंतिं राज्य प्रमुखया नातां राष्ट्रपति वयेगु चलन दु ।

सम्बन्धित बुखँ

LEAVE YOUR COMMENTS