विश्वकप २०१८

नेवाः देय् दबूया जातीय परिषद् नीस्वन

येँ – नेवाः देय् दबुलिं जातीय परिषद् नीस्वंगु दु । देय् दबूया ज्याकुथी सोमवाः नेवाः समुदाय दुनेया थीथी जातीय खलः पुचःया नायः, प्रतिनिधिपिनिगु मुँज्यां देय् दबू विधानया दफा १९ य् व्यवस्था जूकथं जातीय परिषद नीस्वंगु खः ।देय् दबूया नायः नरेश ताम्रकारया सभापतित्वय् जूगु ज्याझ्वलय् १३ गू जातीय खलः पुचःया प्रतिनिधिपिंसं ब्वति काःगु खः ।

नेवाः दुनेया थीथी जाति दथुइ एकता ब्वलंकाः नेवाः भावना व गौरव ल्यंका तयेगु लिसें नेवाः अधिकार प्राप्तिया निंतिं थीथी ज्याझ्वः यायेगु तातुनाः जातीय परिषद् नीस्वनागु खँ देय् दबुलिं धाःगु दु ।

मुँज्यां भाजु अनाररत्न वज्राचार्य (वज्राचार्य समन्वय परिषद्)यात सदस्य सचिव ल्यःगु दुसा भाजु सुरेन्द्र महर्जन (ज्यापु समाज यल), पद्म ताम्रकार (तबः समाज), मनोज ताम्रकार (ताम्रकार कुलदेवता उग्रचण्डीमाई संरक्षण समिति), अनिल नापित (नेपाल नापित समाज) व नरेन्द्र बहादुर तण्डुकार (नेपाल तण्डुकार समाज) यात दुजलय् ल्यःगु खः ।

ज्याझ्वलय् पाहांकथं झाःम्ह सल्लाहकार डा. पुष्पराज राजकर्णिकारं नेवाः देय् दबूया म्हिगः व थौंया उद्देश्य पाःगु धासें थौंया मू उद्देश्य नेवाः भाषा, संस्कृति व संस्कारया प्रवद्र्धन नापनापं नेवाः राजनैतिक अधिकार प्राप्ति यायेगु जुइमाः धयादिल ।

अथेहे नायः ताम्रकारं थीथी जातीय खलः पुचलं नेवाः देय् दबूया थौंतकया थीथी ज्याझ्वः लिसें नेवाः आन्दोलनय् मूवंगु योगदान बिया वयाच्वंगु दु धासें जातीय खलःपुचःया सल्लाह व सुझावय् ततःधंगु निर्णय कायेगु अभ्यास देय् दबुलिं याना वयाच्वंगु दु धयादिल । जातीय परिषद नीस्वनाः जातीय खलः पुचःयात वैधानिकता बिसें सम्मानित थाय् बियागु खँ नं वय्कलं धयादीगु दु ।

सम्बन्धित बुखँ

LEAVE YOUR COMMENTS