काबुलय् विस्फोट, च्याम्ह पत्रकार सित

अफगानिस्तानया राजधानी काबुलय् सोमवाः निगू बम विस्फोटय् लानाः च्याम्ह पत्रकारत लिसें २५ म्ह सीगु दु । विस्फोटय् लानाः सीम्ह मध्ये अन्तर्राष्ट्रिय समाचार संस्था एएफपीया काबुलय् च्वंम्ह प्रमुख फोटोपत्रकार शाह माराई नं लाःगु दु । छम्ह मोटरसाइकलय् वःम्ह आक्रमणकारी न्हापांगु विस्फोट याःगु खः । थ्व विस्फोट जूथाय् सञ्चारकर्मी लिसें सर्वसाधारण हूल मुनाः स्वयाच्वंगुबलय् न्हापांगु विस्फोट जूगुया १५ मिनेट लिपा मेगु विस्फोट याःगु खः ।

एएफपीं निगूगु विस्फोट नियतवश पत्रकारतय्त हे लक्षित यानाः याःगु खँ धाःगु दु ।स्थानीय प्रहरी प्रवक्तायात उद्ढृत यासें निगूगु विस्फोट पत्रकारया भेषय् वःम्ह आक्रमणकारीं भीडया दथुइ वनाः विस्फोट याःगु खँ एएफपीं धाःगु दु । रेडियो फ्री युरोप (आरएफईं) नं थःपिनि निम्ह पत्रकार सीगु खँ धाःगु दु । अब्दुल्लाह हानन्जाई व मोहर्रम दर्रानी नांयाम्ह निम्ह पत्रकार आरएफईयापिं खः ।

आरएफईया हे मेम्ह छम्ह पत्रकार नं विस्फोटय् लानाः घाःपाः जूगु खँ धाःगु दु । अथेहे मेगु अन्तर्राष्ट्रिय समाचार एजेन्सी रोयटर्सं नं थः छम्ह फोटोपत्रकारयात बमया छर्रा लानाः घाःपाः जूगु खँ धाःगु दु । स्थानीय सरकारी अधिकारीं थ्व विस्फोटय् म्होतिं नं च्याम्ह पत्रकार, प्यम्ह प्रहरी सीगु खँ धाःगु दु । ४५ म्ह घाःपाः जूपिंत अस्पताल यंकेधुंकूगु दु ।

एएफपीया कथं वान टिभीया निम्ह, टोलो न्यूजया छम्ह व जहाँ टिभीया छम्ह पत्रकार सीगु खँ धाःगु दु ।मुस्मां आतंककारी संस्था इस्लामिक स्टेटं थ्व आक्रमणया जिम्मेवारी कायेधुंकूगु दु । इस्लामिक स्टेटं छगू विज्ञप्ति पिथँसें गुप्तचर निकायया मू ज्याकूयात लक्षित यानाः आक्रमण जूगु खँ धाःगु दु ।आक्रमण जूगु थाय् शाश्दार क्षेत्रय् अफगानिस्तानया रक्षा मन्त्रालय, गुप्तचर सेवा कार्यालय व उत्तर एटलान्टिक सन्धि संगठन नेटोया ज्याकू लाः ।

सम्बन्धित बुखँ

LEAVE YOUR COMMENTS