तारागाउँयात कारवाही यायेत निर्देशन

येँ – महालेखा परीक्षक कार्यालयं आर्थिक अनियमितता याःगु धासें तारागाउँ विकास समितिया पदाधिकारीतय्त कारवाही यायेत सरकारयात निर्देशन बिउगु दु । समितिया ल्हातय् दुगु ३०४ रोपनी जग्गा मध्ये १५० रोपनी जग्गा व निगू करोड तका बराबरया छेँ तयाः याःगु शेयर लगानीया छुं ल्याःचाः तकं हे मदुगु धासें महालेखां कारवाहीया सिफारिस याःगु खः । समितिया क्षेत्राधिकारय् दुगु बौद्धया जग्गाय् थौंकन्हय् तारागाउँ रिजेन्सी होटल (हयाट होटल) चायेकातःगु दु ।

वि.सं. २०५०÷५१ य् तारागाउँया १५० रोपनी जग्गाया मूल्यांकन १५ करोड व अन च्वंगु छेँया मूल्यांकन निगू करोड यानाः मुक्कं १७ कराड दां होटल चायेकेत समितिं लगानी याःगु खः । तर लगानी याःगु २५ दँ दयेधुंकाः नं आःतक छुं हे प्रतिफल मबिउनिगु खँ धाःगु दु । थ्व होटलय् लगानी याःबलय् समितिया ३९.७७ प्रतिशत शेयर जुयाच्वंगु खः, तर आः थ्व नं म्हो जुयाः ९.०१ प्रतिशत जुइधुंकल । होटलं आ.व. २०७२÷७३ य् पितबिउगु वित्तीय विवरण कथं होटलया शेयर पूँजी १ अर्ब ८९ करोड न्ह्यथनातःगु दु ।

थुकी मध्ये समितिया १७ करोडया ल्याखं ९.०१ प्रतिशत जक शेयर जूवंगु दु । अथेहे समितिया न्यूरोडय् च्वंगु छेँय् नं बालंपाखे ३८ लाख ७७ हजार तका उठे याये ल्यंदनि । तारागाउँ विकास समितिया अध्यक्ष नारदकुमार लुइँटेलं हयाट होटलं दँय्दसं लबः नयाच्वंसां हिसाबय् धाःसा अप्वः खर्च क्यनाः २५ दँ न्ह्यवंनिसें घाटा क्यनाच्वंगु खँ धाःगु दु । तारागाउँ रिजेन्सी होटल (हयाट) अध्यक्ष भारतीय नागरिक राधेश्याम सर्राफ, खःसा प्रबन्ध निर्देशक अरुण सर्राफ खः ।

सम्बन्धित बुखँ

LEAVE YOUR COMMENTS