भारतया ‘सुधारगृह’य् नेपाली मिजंमस्त अलपत्र

मुजफ्फरपुर, भारत – भारतया थीथी सहरय् सलंसः नेपाली मिजंमस्त अलपत्रय् लानाच्वंगु दु । अनया थीथी सहय् च्वंगु बालगृहय् नेपालं वनाच्वंपिं मिजंमस्त अलपत्रय् लानाच्वंगु खः । बालगृह धाःसां अन उपिं जेलय् थें च्वंच्वनेमाःगु अवस्थाय् दु । नेपाः सरकारं मिजं मस्तय्त अनं लित हयेगु खँय् बेवास्ता यानाच्वंगुलिं नं उपिं बालगृहय् कैदी थें च्वनेत बाध्य जुयाच्वंगु खः ।

‘सरकारं भारतया बालगृहय् च्वनाच्वंपिं नेपाली मिजं मस्त लित हयेगु निंतिं छु पहल हे यानाच्वंगु मदु’ गैरसरकारी संस्था छोराछोरी नेपालया कार्यकारी निर्देशक शैलजा सिएमं धयादीगु दु । उगु संस्थां शुक्रवाः जक प्यम्ह मिजं मस्त व स्वम्ह मिसा मस्तय्त बिहारया मुज्जफरपुर व छपराय् च्वंगु बाल गृहं उद्धार यानाः येँय् थ्यंके हःगु खः ।

मय्जु सिएमया कथं मिजं मस्तय्त उद्धार यायेगु निंतिं नेपाःया मेमेगु गैरसरकारी संस्थां नं वास्ता यानाच्वंगु मदु । ‘बाल अधिकारया क्षेत्रय् ज्या यानाच्वन धाःगु संस्थात हे मिजंमस्त प्रति उद्धार खनेमदु’ वय्कलं धयादीगु दु, ‘फुक्क धइथें संस्था मिसा व मिसामस्तय् ख्यलय् जक ज्या यायेत तयार दु ।’

मिजं मस्तय् ख्यलय् विदेशी दातातय्सं ध्यबा यक्व मबीगु व मिजं मस्तय्त पुनस्र्थापना यायेत नं थाकुगुलिं गैरसरकारी संस्थात मिजं मस्त उद्धार यायेत तयार मजुइगु खः । वय्कलं थम्हं समाज कल्याण मन्त्रालयया बैठकय् हे मिजं मस्तय्त उद्धार यायेत प्रस्ताव तयागु खँ कनादिसें धयादिल, ‘न्यय्गुलिं मल्याक संस्थात बैठकय् दुगु खः, तर मिजं मस्तय्त उद्धार यायेत छुं नं संस्था तयार हे मजू ।’

‘बालगृहय् तयातःगु धाःसां नं गनं पिहां वनेमखंक जेलय् थें हे छखा छेँय् तयातइ । स्कुल छ्वइ मखु, आखः ब्वंकी मखु, मानसिक अपाङत लिसे हे मेमेपिं सवलाङ्ग मस्त नं तइ । गुकिं यानाः उपिं तकं मानसिक ल्वगि जुयावइ’ छोराछोरी नेपालया कार्यक्रम संयोजक अनिला डंगोलं धयादी ।‘मिजं मस्त अप्वः थें छेँय् जुइगु घरेलु हिंसाया कारणं बिसिउँ वंपिं जुइ । अथे धायेवं तुं उमिगु स्वतन्त्र जुइगु अधिकार हनन याये फइ मखु ।

बिसिउँ वंपिं धकाः बेवास्ता याये फइ मखु । उमित नं उद्धार यायेमाः’ कार्यक्रम संयोजक डंगोलं धयादीगु दु ।मय्जु सिएमया कथं भारतया बिहार, दिल्ली, हरियाणा, उत्तर प्रदेश, मध्ये प्रदेश, मुम्बइलय् यक्व नेपाली मिजं मस्त अलपत्रय् लानाच्वंगु दु । छोराछोरी नेपालं जक दछि न्ह्यः ३१ म्ह मिजंमस्तय्त बिहारया मुजफ्फरपुर व दरभंगां उद्धार यानाहःगु खः । थुगु संस्थां आःतक उद्धार याःपिं १२२ म्ह मस्त मध्ये ११० म्ह मिजं मस्त खः ।

सम्बन्धित बुखँ

LEAVE YOUR COMMENTS