विश्वकप २०१८

पीडितयात जग्गा न्यायेत ध्यबा

भुखाय् पीडिततय् सामाजिक जीवन प्रभावित जुइगु ज्याझ्वः

येँ – तःभुखाचं छेँ दुना वःपिंत सरकारं गन खः अन हे पुनस्र्थापित याये मफुगु कारणं स्थानीय लागाय् पुस्तौंनिसें च्वना वयाच्वंपिं थीथी जातिया संस्कृति व सामाजिक जीवन समेत तहसनहस जुयाच्वंगु इलय् सरकारं उमिगु संस्कार, संस्कृति व अन्ततः पहिचान हे लोप जुइ कथंया पलाः न्ह्याकेत्यंगु संकेत खने दया वःगु दु ।

भुखाचं वस्ती हे प्रभावित जुयाः च्वने मजियाच्वंपिं पीडिततय्त आः सरकारं न्हापा गन खः अन हे पुनस्र्थापित याये मफइगु जूगुलिं उमित जग्गा न्यायेत समेत ध्यबा बीगु व गन च्वने न्ह्याः अन हे जग्गा न्यानाः च्वं वनेगु नीति हःगु दु । भुखाचं पीडित जूगु थीथी वस्तीइ आः हानं वस्ती बसे याये मछिंगु व वस्ती दयेकल हे धाःसां अन लः, धः, मत आदि थेंज्याःगु सुविधा समेत बी मालीगु जूगुलिं सरकारं पीडिततय्त जग्गा न्यायेत समेत ध्यबा बियाः गन च्वं वने न्ह्याः अन हे छ्वया बीगु नीति काःगु खँ धाःगु दु ।

अथे पीडिततय्त जग्गा न्यायेगु लागिं सरकारं प्रति परिवार निगू लाख तका दां अनुदान बीगु न्हूगु नीति हःगु दु । उमिसं जग्गा न्यायेगु थासय् हे भुखाय् पीडितयात बीगु मेगु सुविधात बीगु खँ धाःगु दु । तःभुखाचं प्रभावित जूगु थाय्त मध्ये आः ३०० गू गांयात मुक्कं हे मेथाय् बसे यायेगु वा वहे थासय् पुनस्र्थापित याये माःगु अवस्था दु । आः तक ११ गू गांयात मेथाय् सारे यायेधुंकूगु दु ।

बाँकी गां सारे यायेत थाकुइगु खनाः सरकारं जग्गा न्यायेत ध्यबा बीगु न्हूगु नीति हःगु खः । भुखाचं पीडित जूपिं तामाङ, मगः आदि जनजातितय्सं थःपिंत अलग थलग जुइक पुनस्र्थापित मयायेत सरकारयात इनाप याना वयाच्वंगु दु । थथे जुइबलय् थःपिनिगु सामाजिक जीवन प्रभावित जुयाः जातीय पहिचानय् समेत संकट वइगु खँ उमिसं धयाच्वंगु दु ।

थःपिंत थज्याःगु समस्या मवयेमा धकाः न्हापा थें छगू थासय् गुचमुच्च हे वस्ती दयेका बीत नं उमिसं सरकारयात इनाप याना वयाच्वंगु दु । सरकारं आः उमित न्हापा थें हे एकीकृत वस्ती दयेकाः पुनस्र्थापना यायेगु पलेसा तितर बितर जुयाः हे पुनस्र्थापित जुइ माली कथंया नीति हःगु दु । भुखाय् लिपा हानं एकीकृत वस्ती दयेकेबलय् अन पूर्वाधार निर्माण यायेत अझ थप ध्यबा मालीगु जुयाः जग्गा हे न्याना बीगु नीति हयागु दावी सरकारं यानाच्वंगु दु ।

सरकारया थ्व न्हूगु नीतिया खँय् नं पीडित जनजाति समुदाय असन्तुष्ट जूगु खँ सूत्रं धाःगु दु । उमिसं थुकियात कयाः नं सरकार व राष्ट्रिय पुनर्निर्माण प्राधिकरणया ध्यानाकर्षण यायेत स्वयाच्वंगु खँ धाःगु दु । सरकारया थ्व नीति कथं सुनां नं जग्गा न्यायेत ध्यबा काः वंगु धाःसा मदुनि ।

सम्बन्धित बुखँ

LEAVE YOUR COMMENTS