निदँया दुने ६६० मेगावाट मत

येँ – वइगु निदँया दुने दयेकाच्वंगु छगू दर्जन स्वयां अप्वः आयोजना क्वचायाः राष्ट्रिय प्रसारण लाइनय् ६६० मेगावाट थप मत स्वाइगु जूगु दु । नेपाल विद्युत प्राधिकरणं तयार याःगु वइगु दँया मत उत्पादन प्रक्षेपणय् वइगु दँय् सार्वजनिक व निजी क्षेत्रं यानाः उगु परिमाणया मत उत्पादन जुइगु अनुमान यानातःगु खः ।

वइगु दँय् माथिल्लो तामाकोशी दयेकेगु ज्या क्वचायाः ४५६ मेगावाट मत थप जुइत्यंगुलिं मत उत्पादनया परिमाण अप्वःगु खः । मेगु फुक्कं आयोजना निजी क्षेत्रया खः उकिमध्ये ४० मेगावाटया खानीखोल १, २७ मेगावाटया दोर्दीखोला २५ मेगावाटया अपरदोर्दीखोला २३.५ मेगावाटया सोलुखोला आयोजा निदँया दुने क्वचायेत्यंगु दु ।

अथेहे २२.२ मेगावाटया अपरचाकु खोला ए, २२ मेगावाटया बागमति साना आयोजना, १८ मेगावाटया माथिल्लो सोलु, १४.८ मेगावाटया माथिल्लो सान्जेन, ६.४ मेगावाटया माथिल्लो मैलुङ १, ३.३ मेगावाटया खप्तगाड व ३.२ मेगावाटया गेलुनखोला आयोजना सम्पन्न जुइगु खँ धाःगु दु । वइगु असार तक २१ क्वचायाः १९५ मेगावाट मत थप जुइगु जूगु दु । वंगु साउन थुखे १४ गू आयोजना दयेकेगु ज्या क्वचायाः १ सय मेगावाट मत थप जुइधुंकूगु दु ।

वइगु असार तक क्वचाइगु आयोजना मध्ये अरुण कावेली पावर लिमिटेडं दयेकाच्वंगु २५ मेगावाटया कावेली बी, माथिल्लो मोदी इनर्जीं दयेकाच्वंगु २० मेगावाटया मोदी, अपी पावर कम्पनीया ८ मेगावाटया माथिल्लो नौगाड, माउन्टेन नेपाल हाइड्रो पावरया २१.६ मेगावाटया तल्लो हेवाखोला, रैराङ हाइड्रो पावरया ९.९ मेगावाटया इवाखोला, विन्ध्यवासिनी हाइड्रो पावरया ८.८ मेगावाटया रुदीखोला व बराही हाइड्रो पावरया १.५ मेगावाटया थेउलेखोला आयोजना खः ।

निजी क्षेत्रया ७३ आयोजनापाखें ५११ मेगावाट मत उत्पादन जुइधुंकूगु दु । सार्वजनिक व निजी क्षेत्रपाखें आः तक १ हजार १९ मेगावाट मत उत्पादन जुइधुंकूगु दु । असार लिपांगु वालय् तक जडित क्षमता १ हजार ११४ मेगावाट थ्यनिगु खँ धाःगु दु ।
नेपाल विद्युत प्राधिकरणं पातीय प्लाण्टपाखें ५३ मेगावाट मत उत्पादन याना वयाच्वंगु दु ।

सम्बन्धित बुखँ

LEAVE YOUR COMMENTS