म्ह तःधं जुइवं मनू तःधं जुइ मखु

न्हापा बाराणसीइ वोधिसत्व देवेन्द्र शक्र जुयाः जन्म जुल । उगु इलय् जुजु देवदत्तं राज्य यानाच्वन । जुजुं सुं बुरापिं खन कि इपिं नापं म्हिनीगु । उमित लिना यंकीगु । बुरिपिं दःसां उमित सःतके छ्वइगु । उमित प्वाथय् दाइगु । थसः पायेका बीगु । ग्वारातुका बीगु । हानं थनाः ख्याना छ्वइगु । न्ह्यःने बुराबुरिपिं वये हे मजिउ । मनू जक मखु ।

बाज्यः वंपिं किसि, सल वा द्वहंत तकं खंके मजिउ । उमित तकं लित्तुलिना जुइगु । उकी हे न्ह्यइपुगु तायेकीगु । जुजुया ब्यवहारं मनूत मछाल । थःथिति मांबौपिं थः नाप तये मछाल । उमित विदेश छ्वया बिल । मांबौया सेवा याये मंदुपिं नं दु । अय्नं उपिं मांनाप च्वने मखन । जुजु जक मखु वया पासापिं नं उकथंया स्वभावयापिं हे लात । थज्याःगु ब्यवहारं यानाः गुलिं सिना वन ।

उपिं नरकय् लात । थुकिं यानाः नरकय् वंपिं ग्वाःग्वाः जुल । देवपरिषद् पाः जुल । देवपरिषद् पाः जुयाः शक्रं कारण बिचाः यात । शक्रं थुकिया कारणं सीका काल । अनंलि जुजुयात दमन याये माल धकाः बिचाः यात ।शक्र बुराम्ह मनू जुयाः वल । वं पुलांगु भ्वाथःगु गाडा निगः दयेकल । उकी मही दुगु घः तल । उकियात सालेत बुरापिं द्वहंत तल ।

छन्हु उत्सवया दिं । ब्रम्हदत्त जुजु किसिम्हय् च्वना वल । नगरय् चाःहिलाच्वन । शक्र भ्वाथःगु वसः पुनाः थःगु गाडा न्ह्याका वल । व जुजुया न्ह्यःने थ्यन । जुजुं उगु गाडा हटे यायेत उजं बिल । तर गाडा जुजुं जक खंगु जुयाच्वन । जुजुं गाडा चीकि धायेवं मेपिं अजू चाल । उमिसं गाडा गन दु खने मदु धकाः न्यन । शक्रया प्रतापं गाडा जुजुं जक खन ।

शक्रं जुजुया फुसं फुसं गाडा न्ह्याकल । गाडाय् च्वंगु घः जुजुया छ्यनय् हात । घः तज्यात । महि दक्व जुजुया म्हय् वात । म्ह प्यात । हानं मेगु घः नं तज्यात । जुजुया म्ह छम्हं प्यात । जुजु ग्यात । दिक्क चाल । म्ह छम्हं महि वाःगुलिं घचाल ।
शक्रं जुजुं ग्याःगु खन । अनंलि गाडा नापं थः नं अन्तध्र्यान जुल । शक्रं थःगु रुप धारण यात ।

ल्हातय् बज्र धारण यानाः आक्सय् दन । अले धाल, ‘अरे पापी अधर्मी जुजु ! छ छु बुरा जुइ मखुत ला ? छंगु शरीर बुरा जुइगुलिं दुःख मबी ला , म्हिते याःम्ह जुयाः बुरापिंत दुःख बियाच्वन । छंगु ज्याखं यानाः सिनावंपिं नरकय् जायाच्वन । मनूतय् मांबौया सेवा यायेगु मौका मदयाच्वन । छं थःगु ज्या मत्वःतूसा बज्रं छंगु छ्यं तछ्याना बी । आवंलि अज्याःगु कर्म याये मते ।’

शक्रं जुजुयात थुकथं ख्यात । अनंलि वयात मांबौया गुण थुइका बिल । थकालिपिंत सेवा यायेगुया फल कन । सकतां खँ थुइकाः शक्र थःगु निवासय् लिहां वन । न्ह्यइपुकेगु स्वभाव नं थःथःगु कथंया जुइ । गुलिं न्ह्यवःसाय् म्हिताः न्ह्यइपुकी । चाःहिलाः न्ह्यइपु तायेकी । प्याखं स्वयाः साः भिं नयाः नं न्ह्यइपुकी । तर जातकय् जुजुया न्ह्यइपुकीगु पहः पाः । वैंस दुपिं बल्लाःपिं मखु ।

निर्वल असक्षम प्राणीपिंत लित्तुलिना जुइगु । उमित ब्वाकाः थः लय्ताया जुइगु । अझ प्वाथय् प्यंकीगु । थसः पायेकाः दयेकीगु । थ्व छगू कथंया अमानवीय ब्यवहार खः । थज्याःगु ज्याखँ यात कि दण्ड बीमाःगु खः । तर जुजुया न्ह्यःने दनीम्ह सु ? सः तइम्ह सु ? विरोध याइम्ह सु ? बरु थः मांबौयात हे थःपिंपाखें तापाक तये यंकल । च्वय्या दर्जाय् च्वंम्हेस्यां असत्य ज्याखँ याःसां बिरोध याये मफइगु स्वभावयात जातकं उला बिउगु दु ।

थन पलख न्ह्यइपुकेया लागिं कुकर्म यात । तर कुकर्मया आयु ताःहाकः जुइ मखु । कुकर्मया लिउ लिउ जक वंसा नरक भोग याये माली । जातकय् जुजुया लिउ लिउ वनाः कुकर्म याःपिं सित । सिना वनाः उपिं सकलें नरकय् जन्म जूवन । थुकिं यानाः नरक छगुलिं जाल । तर देवलोक खाली जुल ।

कुकर्म ज्याखँयात इलय् पनेमाः । थथे याये मफुत कि कुकर्म ज्याखँ गबलें दिकी मखु । चायेकं वा मचायेकं कुकर्म यानाच्वनी । थःगु ज्याखँ निरन्तरता बियाच्वनी । थुकिया लागिं ख्याच्वः बीमालेफु । शक्रं नं जुजुयात थथे हे यात । जुजुयात थःगु पहलं ख्यात । जुजुं याःगु कर्मया बोध याके बिल । कुकर्म याये मजिउगु खँ कन । अझ जुजु जुयाः यायेमाःगु ज्याखँया बारे अर्ति उपदेश तकं बिल ।

थुकी शक्रं जुजुयात अनित्यया बोध नं याका बिल । सदां जुजुयाके जक वैंस ल्यना च्वनी मखु धइगु खँ ध्वाथुइका बिल । शक्रं जुजुयात छु छ बुरा जुइ मखु ला धकाः न्ह्यसः तकं न्यन । थुकिं यानाः जुजु न्ह्यलं चाः थें जुल । अनं लिपा जुजुं कुकर्म गबलें मयात । जुजु धायेवं देयया थकालि । देय् जुजुया उजंकथं न्ह्याइ । जुजुया नियमं वनी । न्ह्याम्ह हे जुजु जूसां व देय्या सर्वेसर्वा ।

वया बिरोध यायेगु आँट दइ मखु । थुकथं तःधंम्ह । अझ जुजुयात द्यः कथं भाःपी । उकिं जुजु प्राणवान जुइमाः । बुद्धिमान जुइमाः । मखुसा थकालिम्ह जूसां क्वकालिम्ह सरह जुइ । शरीर तःधं चीधंया मू मदु । वैसं थकालि क्वकालिया मू मदु । अझ पदया नं सीमा मदु । बुद्धिमान व प्रज्ञावानम्ह हे तःधं जुइ धइगु खँ जातकय् थुकथं न्ह्यथनातःगु दु –

‘हँय्त, ब्वहत, म्हय्खात चल्लात व मेमेपिं पशुत सिंह खनाः ग्याः । तर शरीर चीधं तःधंया छुं मतलब मदु । वर्षं क्वकालि हे जूसां बुद्धिमानम्ह जुल धाःसा वहे तःधं जुइ । म्ह जक तःधं जुयाः तःधी जुइ मखु । अथे हे मनूतय्गु पुचलय् चीधिकःम्ह जूसां चीधंगु शरीर दुपिं जूसां प्रज्ञावानम्ह मनू हे महान जुयाच्वनी । प्रज्ञा मंत धाःसा तःधिकःम्ह मनू जूसां शरीर तःधं जूसां नं व चीधिकःम्ह हे जुइ ।

 

सम्बन्धित बुखँ

LEAVE YOUR COMMENTS