निःशुल्क शिक्षाया निंतिं आन्दोलन

येँ – अखिल क्रान्तिकारीया अध्यक्ष चिरञ्जीवी ढकालं न्हूगु शिक्षा प्रणालीया मागया लिसें शैक्षिक समस्या म्हसीकाः तत्काल सुधार यायेत माग यानादीगु दु । अखिल क्रान्तिकारीं म्हिगः ग्वसाः ग्वःगु ‘वर्तमान शिक्षाया समस्या व समाधान’ विषयक अन्तक्र्रिया ज्याझ्वलय् न्ववायेगु झ्वलय् वय्कलं उगु माग यानादीगु खः ।

वय्कल शिक्षा क्षेत्रय् खनेदुगु समस्या ज्यंकेत संगठन न्ह्यानाच्वंगु खँ कनादिसें सरकार व निजी विद्यालयं याःगु उधारो सम्झौतायात कार्यान्वयन यानाः त्वःतेगु ख्याच्वः नं बियादिल । वय्कलं थनिंनिसें आन्दोलन यायेगु ख्याच्वः नं बियादीगु दु ।
अन्तक्र्रिया ज्याझ्वलय् रातो खबर प्रकाशनया निर्देशक गुणराज लाहनीं ‘वर्तमान शिक्षाया समस्या व समाधान’ विषयया कार्यपत्र न्ह्यब्वसें राज्य सत्ता परिवर्तनया लिसें शिक्षा प्रणालीइ आमुल हिउपाः हयेमाःगु धापू धयादीगु खः ।

वय्कलं पाठ्यक्रम हिलाः हे व्यावहारिक व सीपमुखी शिक्षा आवश्यक जूगु खँ कनादीगु दु । ज्याझ्वलय् न्ववासें प्राध्यापक लिसें शिक्षाविद डा. मनप्रसाद वाग्लें शिक्षा डुबे जुल धाःसा देश डुबे जुइगु खँ कनादिसें उकिया निंतिं विद्यार्थीं थःपिंसं सः थ्वयेका च्वनेमाःगु खँ कनादिल । वय्कलं संविधानया धारा ३१ कथं फुकसितं निःशुल्क शिक्षा बीमाःगु खँय् बः बियादिल ।

फुकसिंत निःशुल्क शिक्षाया निंतिं ड्रेसप, खाजा व किताब निःशुल्क जुइमाः । निजी विद्यालय बन्द यायेमाःगु खँ कनादिसें वय्कलं शिक्षाय् बजेटया २० प्रतिशत फ्यायेमाःगु खँ नं कनादिल । वय्कलं धयादी, ‘बजेट अप्वयेकेत विद्यार्थीं आन्दोलन यायेमाः ।’

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन