एकता न्ह्यः केन्द्रीय कमिटी घोषणा तयारी

येँ – नेकपा एमाले व माओवादी केन्द्र दथुइ आः पार्टी एकीकरणया घोषणा स्वयां नं न्ह्यः निगुलिं पार्टीया छगू हे केन्द्रीय कमिटी निं घोषणा यायेगु तयारी जुयाच्वंगु खँ धाःगु दु । म्हिगः थनया राष्ट्रिय सभागृहय् जूगु नेपाल कम्युनिष्ट पार्टी स्थापना दिवसया ज्याझ्वलय् न्ववासें माओवादी केन्द्रया अध्यक्ष पुष्पकमल दाहालं थुकिया जानकारी बियादीगु खः ।

म्हिगः हे फुसा पार्टी एकता घोषणा यायेगु वा एकताया सवालय् छुं न्हूगु खँ घोषणा याये माली धकाः निगुलिं पार्टीया शीर्ष नेतातय्सं कुतः याःगु खः । खास यानाः म्हिगः मेगु छुं मखुसां निगुलिं पार्टीया छगू हे केन्द्रीय कमिटी निं दयेकाः घोषणा याना छ्वयेगु धकाः तकं तयारी जूगु खः । सूत्रं धाः कथं थौंकन्हय् निगू पार्टी एकीकरणय् थीथी खँ मिले मजूनि धकाः चर्चा जूसां केन्द्रीय कमिटीइ बराबरीया अवस्था वल धाःसा मेगु खँ अथें मिले जुया वनीगु अनुमान यानाच्वंगु दु ।

म्हिगः सुथय् तकं उकिया लागिं कुतः जूगु खःसां सफल धाःसा जुइ मफुत । बरु म्हिगः निगुलिं पार्टीया एकता संयोजन समितिया ग्वसालय् जूगु नेकपा स्थापना दिवसया ज्याझ्वलय् लेनिनया किपा मदुगु ब्यानर तल धकाः माओवादी कार्यकर्तातय्सं याःगु हुटिङं धाःसा निगुलिं पार्टीया नेतातय्त थारान्हुइका बिउगु खँ सूत्रं धाःगु दु ।

ब्यानरया खँय् हाःहू जुयाः अन्ततः न्हापा तयातःगु ब्यानर लिकयाः लिपा लेनिन व माओया किपा दुगु मेगु ब्यानर हयाःलि निगुलिं ब्यानर तयाः ज्याझ्वः सञ्चालन याये माःगु खः । थुकिया निंतिं निगुलिं पार्टीया शीर्ष नेतातय्सं क्षमा फ्वंगु दु ।

सम्बन्धित बुखँ

LEAVE YOUR COMMENTS