विश्वकप २०१८

च्याम्पियन सिटी

थगुने म्यानचेस्टर सिटीं छुं हे त्याकेमफु । उकिं न्ह्यसः दंगु खः, गनं पेप ग्वार्डिओला इंग्लिस भूमिइ असफल सावित जुइगु जकं मखुला ? छगू कथं ग्याःचिकु खः थ्व ग्वार्डिओलाया प्रशंसकतय् नितिं । ग्वार्डिओला थ्वयां न्ह्यः बार्सिलोना व बायर्न म्युनिखय् प्रशिक्षक खः । थुपिं निगुलिं क्लबया नितिं व तसकं सफल सावित जुल । उलि जक मखु, थुपिं निगुलिं क्लबया नितिं ग्वार्डिओलां थःगु न्हापांगु सिजनय् हे छुं कि छुं उपाधि त्याकूगु खः ।

थ्व हे स्थिति धाःसा सिटीइ जुइ मफुत ।उकिं हे थज्याःगु खँ वःगु खः– छु जूगु जुइ ग्वार्डिओला व सिटीयात । थुगुसी थुकिया लिसः वःगु दु । सिटी नकनिति हे जक इंग्लिस प्रिमियर लिग च्याम्पियन जूगु दु । लिपांगु न्हय्द“य् सिटीं लिग त्याकूगु थ्व स्वक्वःगु खुसी खः । छगू कथं धायेगु खःसा सिटीं थुगुसी छु परिस्थितिइ लिग त्याकीगु निश्चित जुल, व धाःसा म्हाइपुसेच्वंगु स्थिति हे खः ।

निवाः न्ह्यः हे थःगु घरेलु मैदानय् सिटीयाके लिग त्याकेगु ह्वःताः वःगु खः, व नं म्यानचेस्टर युनाइटेडयात बुकाः । उगु कासाय् छगू इलय् सिटी निगू गोलं न्ह्यःने नं लाःगु खः । अय्नं सिटी उगु कासाय् ३–२ गोलं पराजित जुल । अनलिं सिटी युरोपेली च्याम्पियन्स लिगया क्वाटरफाइनलया निगू लेगय् लिभरपुलनाप बांमलाक बुत । ग्वार्डिओलाया नितिं थ्व वयागु पूरा कासा जीवनय् तसकं म्हाइपुगु स्थिति जुल जुइमाः ।

थ्व हे बांमलाःगु स्थितिं मुक्त जुसें सिटीं लिगय् टोटनहमयात पराजित यात । थुबलय् सिटी लिग उपाधिया तसकं सतिक थ्यन । मेगु कासाय् युनाइटेड वेस्ट ब्रुमया ल्हातं अप्रत्यासित रुपं बुत । थ्व हे लिच्वलं सिटीयात लिगया च्याम्पियन दयेकल ।
‘न्ह्याःगु जइमाः सिटीं लिग त्याकूगु दु, उकिं जि तसकं लयताः,’ ग्वार्डिओलां लिपा प्रतिक्रिया बिउगु खः । सिटीं थ्वयां न्ह्यः लिग कप नं त्याकूगु खः । एफए कपपाखें धाःसा सिटी पिने लायेधुंकूगु दु ।

अले च्याम्पियन्स लिगया लिच्वः ला सकसिया न्ह्यःने हे दु । थ्व ल्याखं ग्वार्डिओला व सिटीया नितिं थ्व मिश्रित लिच्वः खः । लिगया उपाधि तःधंगु ला खत, तर सिटीया नितिं च्याम्पियन्स लिगय् सेमिफाइनल तक थ्यने मफुगु धाःसा निश्चित ल्याखं असफलता खः । अय्नं छगू ल्याखं ग्वार्डिओलाया प्रशंसा याये हे माः । थुकिया कारण खः, सिटीं थगुसी म्हितूगु आक्रामक फुटबल । छगू इलय् बार्सिलोनां गुकथं आकर्षक, अले उतिकं आक्रामक फुटबल म्हितीगु खः, व आः सिटीं म्हिताच्वंगु दु ।

दकलय् तःधंगु खँ ला छु धाःसा सिटीया फुटबल थ्व झ्वलय् अतिकं कलात्मक नं जुल । थुकिया नितिं ग्वार्डिओलां थःत माः कथं खास खास कासामि नं न्यायेगु ज्या यात । वया पहःया फुटबल इंग्ल्यान्डया नितिं न्हूगु खः । थुकिया कारणं इंग्लिस फुटबल तःमि नं जूगु दु ।

सम्बन्धित बुखँ

LEAVE YOUR COMMENTS