दर्जनौं सरकारी ज्याकुथिं हे लेखा परीक्षण मयाकू

येँ –  महालेखा परीक्षकया ज्याकुथिं नियमित लेखा परीक्षण मयाकूगु सरकारं संस्था हे दर्जनौं दुगु खँ धाःगु दु । थथे लेखा परीक्षण तकं मयाकूगु सरकारी संस्थायात कारवाहीया दायराय् हयेगु निंतिं कानुन हे संशोधन यायेमाःगु खँ नं महालेखा कार्यालयं धाःगु दु । महालेखाया कथं गुलिखे संस्थातय्सं थगुनेया लेखा परीक्षण याकूगु मदुनिसा गुलिखे संस्थातय्सं वर्षौं न्ह्यवनिसें लेखा परीक्षण मयाकूगु खँ धाःगु दु ।

नियमित रुपं दँय्दसं यायेमाःगु लेखा परीक्षण मयासें हे अज्याःगु निकायतय्सं दँय् अर्बौं कारोवार यानाच्वंगु धासें महालेखां थज्याःगु निकाययात कारवाहीया दायराय् हयेगु निंतिं छुं कथया कानुन तकं बने मजूनिगु खँ धाःगु दु । दँय् थ्यंमथ्यं डेढ अर्ब तकाया कारोवार याइगु नेपाल खानेपानी संस्थान न्यादँ न्ह्यवनिसें लेखा परीक्षण मयाकूनि ।

थुकिया निंतिं न्हापायापिं पदाधिकारीपिं जिम्मेवार दुगु धासें संस्थानया महाप्रबन्धक भूपेन्द्र प्रसादं बिबिसीलिसे खँ ल्हासें धयादीगु दु, ‘तत्कालिन अवस्थाय् हे व्यवस्थापनं थुकियात गम्भीर रुप कयाः परीक्षण याकेमाःगु खः ।तर दथुइ छुं समस्या जुल, व यायेमफुत । तर आः जिमिसं थुकियात उच्च प्राथमिकताय् तयाः ज्या यानाच्वनागु दु ।’

नियमित रुपं दँय्दसं यायेमाःगु लेखा परीक्षण मयासें हे अज्याःगु निकायतय्सं दँय् अर्बौं कारोवार यानाच्वंगु दु ।
महालेखा परीक्षकया कार्यालय

महालेखा परीक्षकया कार्यालयया प्रतिवेदन कथं थथे नियमित लेखा परीक्षण मयाकूगु संस्थानय् नागरिक उड्डयन प्राधिकरण निसें जनक शिक्षा सामग्री केन्द्र, त्रिभुवन विश्वविद्यालय, नेपाल पर्यटन बोर्ड थेंज्याःगु छगू दर्जनं मल्याक संस्था दु ।लेखा परीक्षण मयाकूसां कारवाही यायेगु कानुन मदुगुलिं थथे लापरवाही याइगु खँ महालेखां धाःगु दु । आःतक थथे लेखा परीक्षण मयाकूगु निकायया नां सार्वजनिक यायेगु व नैतिक दबाब बीगु तकं चलन मदुनि ।

उप महालेखा परीक्षक रामुप्रसाद डोटेलं थथे लेखा परीक्षण मयाकूगु निकायया पदाधिकारीपिंत हे कारवाही यायेगु निंतिं स्पष्ट कानुन दयेकेत प्रस्ताव छ्वयेधुनागु खँ धयादीगु दु ।‘लेखा परीक्षण ऐन परिवर्तन जुइत्यंगु दु, उकी जिमिसं लेखा परीक्षण मयाकूगु संस्थायात कारवाहीया सिफारिस यायेगु प्रस्ताव तयागु दु । आः थ्य मस्यौदाया रुपय् दु ।’

आः लेखा परीक्षण मयाकाच्वंगु निकायतय् नां सार्वजनिक जुइवं उमित लेखा परीक्षण यायेत दबाब धाःसा जूवंगु दु । थथे हे लेखा परीक्षण मयाकूनिगु संस्था नेपाल खाद्य संस्थानया प्रवक्ता शंकर सापकोटां २०६९ निसें ७१ साल तकया लेखा परीक्षण संचालक समितिपाखें अनुमोदन जुइधुंकूगु खँ कनादिसें व धुंकाःया आर्थिक दँया अन्तिम प्रतिवेदन अध्ययनया झ्वलय् दुगु खँ धयादीगु दु ।

दछि निसें न्यादँ तक लेखा परीक्षण मयाःगु संस्थात थुकथं दु – गुथि संस्थान, नेपाल नागरिक उड्डयन प्राधिकरण, राष्ट्रिय आवास कम्पनी, जनक शिक्षा सामग्री केन्द्र, नागरिक लगानी कोष, नेपाल रेल्वे कम्पनी, सांस्कृतिक संस्थान, राष्ट्रिय बीमा संस्थान, राष्ट्रिय बीमा कम्पनी, नेपाल पर्यटन बोर्ड, नेपाल खानेपानी संस्थान, नेपाल खाद्य संस्थान, नेपाल औषधि लिमिटेड, उदयपुर सिमेन्ट, जडीबुटी उत्पादन तथा प्रशोधन कम्पनी, गोरखापत्र संस्थान, नेशनल ट्रेडिङ लिमिटेड, पशुपति विकास कोष, त्रिभुवन विश्वविद्यालय ।

 

सम्बन्धित बुखँ

LEAVE YOUR COMMENTS