अकुशल कर्म याये मजिउ

सिद्धार्थ गौतमं बोधिज्ञान ध्यानं लाना काये सयेकेधुंकाः आः जिं सयेकागु, थुइकागु ज्ञान सुइत कने सुइत कने धकाः मामां वंबलय् न्हापा थः हे नाप जूपिं ब्राम्हण पासा न्याम्हेसित नाप लानाः दकलय् न्हापां थःगु ज्ञान इना बिल । धर्म देशना यानाथाय् सकलसितं वसपोलं थुज्वःगु खँ कनाबिज्यात कि मनूतय्सं वाःचायेके हे मफइगु कथंया धर्म देशना जुल ।

वसपोल तःदँ तक ध्यान च्वंगु इलय् पूर्वजन्म व लिपायागु जन्मय् सु गन छु जुयाः जन्म काःवनी धइगु खँ तकं कने सयेकाबिज्यात । थ्वहे झ्वलय् वसपोलं थः बुद्ध जुइधुंकल धकाः घोषणा नं यानाबिज्यात । न्हापा न्हापायागु खँ थुकथं कना बिल कि मनूतय्सं अकुशल कर्म यात कि आयु क्षीण जुजुं वनी धकाः सीकल ।

थुथाय् लाक्क बुद्धया उपदेश सफू ‘त्रिपिटक’ या लिधंसाय् आयु सम्बन्धी खँ छकू लुमंकेबहः जूथें च्वं । खँ छु धाःसा अधर्म अप्वः जुया वँवं मनूतय्सं मखु मखुगु ज्याखँ याना हल । न्हापा न्हापा मनूतय्गु आयु चय्द्वः (८०,०००) दँ तक दुगु जुयाच्वन । तर उगु व्यवहार याना हसांनिसें अधर्म सुरुवात जुयाः चय्द्वःदँ आयु दुम्हेसिया काय वा सन्तानया आयु म्हो जुयाः पीद्वः (४०,०००) दँ जक जूवन । मभिंगु ज्या याइपिं आपाः दुसेंलि असत्य खँ ल्हायेगु व चुकलि याइपिं अप्वः दया वल ।

काम बासनाय् लगे जुइपिं नं अप्वः अप्वः दयावल । अले लिपा ला अधर्मया पापं यानाः पीद्वःदँ दुम्हेसिया सन्तान न्याद्वः (५,०००) दँ तक जक म्वाइगु जुल । अले हानं मेगु अधर्मया खँ ल्हासें मनूतय्सं छाक्क छिक्क खँ ल्हायेगु याना हल । हानं मेगु ज्या ख्यले मजूगु खँ नं ब्यवहारय् छ्यलाहल । थुगु खँत यानाः लिपा मनूतय्गु आयु नीन्यासः दँ जक जूवन । धर्मया खँ ब्यवहारय् छ्यलेगु पलेसा लोभ लालच यायेगु, मेपिनिगु सम्पत्तिइ मिखा वंकेगु ज्या जुयाच्वन ।

करपिंत स्यंकेगु व स्यंसां जिउ धाइपिं नं दयावल । थुकथं लिपा मनूतय्गु आयु द्वःछि दँ तक जुयावन । धर्म क्वपाला वँवं आपालं मनूतय्सं मिथ्या दृष्टिं स्वयेगु, अधर्म नं अप्वः याना हल । मखुगु म्वाः मदुगु बिचाः याइपिं दया वल, ल्वापु याना जुइगु सयेका हल । मनूतय्सं थवंथः हे ल्हातय् जःगु ज्याभः ल्वाभः ज्वनाः स्याये थें पाले थें याइगु जुयावल ।

धर्मया खँ ल्हाइपिं ब्यवहारय् मदया वन । कुकर्मत बढे जुजुं वल । गन पाप कर्म याइपिं दया वइ, अन धर्म लोप जुजुं वनाः मनूतय्गु आयु नं म्हो म्हो जुजुं वनीगु जुयावल ।

अनं लिपा मनूतय्गु आयु न्यासःदँ तक पाः जुया वंबलय् स्वंगू किसिमया कुकर्म थपे जुल–१) धर्मया विपरित इच्छा धइगु थः मां निनि, अजि, काकी, बौ, काका, बाज्यापिंत कतः थें ब्यवहार यायेगु, २) आपालं लोभ याना हयेगु, ३) द्वंगु धर्म धइगु मिजंतय्सं मिजं जक व मिसातय्सं मिसायात हे जक स्वइगु याना हल । मेगु लिपा मनूतय् अधर्म बढे जुया वँवं निसःत्या दँ थ्यन । अबलय् मनूतय्सं मां, अबु, ब्राम्हण कूलतय्गु न्ह्यःने क्वमालि जुयाः आदर गौरव तयेगु धइगु हे मदयेक हल ।

थुगु कथं मनूतय्के धर्मया आचारण म्हो म्हो जुजुं वँवं वर्ण बांमलानाः वनाःलि निसःत्यादँ आयु दुम्हेसिया सन्तान बूबलय् सछिदँ तक जक दया वन । अथे धइगु झी बुद्धयागु थुलि हे जक खः धइगु धर्मदेशना यानाबिज्यात । थुकिं खँ छु सी दत धाःसा मनूतय्गु आयु म्हो जुजुं वंगुया मुख्य कारण हे मनूतय्सं शिल भंग याना जुइगु व अमंगल ज्या याना जूगुलिं खः । मनूतय्सं मखुगु ज्या धइगु बाध्य जुयाः जक याइगु खः ।

गथे कि धनसम्पत्ति यक्व दुपिंसं चीमि (गरिब)तय्त ग्वाहालि मयाःगुलिं उमिसं हे मेपिनि सम्पत्तिइ मिखा तइगु प्रबृत्ति अप्वया वल । थुकिया लिसें ज्वःगु ल्वाभःत छ्यलाः, क्यनाः लुटे यायेगु, छकःयागु धम्की माने मजूसा वा मबिउसा स्याये पालेगु धइगु छुं हे मखु थें च्वंक बढे जुजुं वल । धर्मया खँ ल्हाइपिं ब्यवहारय् मदया वन । कुकर्मत बढे जुजुं वल । गन पाप कर्म याइपिं दया वइ, अन धर्म लोप जुजुं वनाः मनूतय्गु आयु नं म्हो म्हो जुजुं वनीगु जुयावल ।

याये मजिउगु ज्या, धाये मजिउगु खँय् सुनानं वास्ता मयाना हल । छेँछेँयागु खँ स्वयेबलय् मां अबु थः सन्तान धकाः माया करुणा यक्व तयाः जूसां सन्तानपाखें हे मांबौ व थः स्वयां थकालिपिंत सद्ब्यवहार धइगु क्वमालि जुयाः मान मर्यादा तयेगु म्हो याना हयेगु सयेका छ्वयाहल । फलस्वरुप छेँय् छेँय् ल्वापु बढे जुजुं वयाच्वन । कलातं न्हापा भाःतयात द्यः थें माने याना तइगु न्यनागु खःसा आः थौं म्हिगः कलाःयात भाःतं व भाःतयात कलातं पासा पासा थें ब्यवहार याइगु जुयावल ।

भाःत जूम्हेस्यां थः कलाःयात न्ह्यब्वःसा थें ब्यवहार याना हल । छेँय् कलाः दुसां पिने मेम्ह हे कलाः तइगु प्रबृत्ति वा छेँय् हे दुत हयेगु प्रबृत्ति याना हल । मेगु हानं श्री सम्पत्तिया लोभ लालच बढे जुयाः थः भाःतयात वा भाःतं कलाःयात तक हे स्याना जुइगु जुल । हनेबहःपिं बुढापाकातय्सं तक हे थः म्ह्याय् छय् मधासे बलात्कार थेंज्याःगु कुकर्म याना हयेधुंकल । थज्याःगु मत्यःमत्यःगु कुकर्म बढे जुयाः थःगु आयु मत्यःनिवं हे सिना वनीगु जुयाच्वंगु नं झीसं खनाच्वना ।

लुमंकेमाःगु खँ छु धाःसा झीगु देय् नेपाः धइगु येँय् जक मखु । स्वनिगः जक नं मखु । थौंकन्हय्या न्हय्निगुलिं प्रदेश दक्वं खः । स्वनिगलं पिनेयागु नं झीसं बिचाः यायेमाः । गुगु थासय् च्यादँ दुम्ह मिसामचा नं बलात्कार जुइ, गन निर्दोषम्ह मिसायात तकं बोक्सी पाः यानाः बाम्हसिक्क दाइ । अज्याःगु समाज धात्थें तिरस्कृत जुइ । मिसातय्त याइगु अमानवीय ब्यवहार व मिसा हिंसा मदयेकेगु ज्या नं धर्म हे खः ।

वास्तवय् आयु ताहाकेगु व स्वस्थ जुयाः म्वायेगु खःसा बुद्धं देशना याना बिज्याःगु शिल धर्म पालना मयासें मजिउ । वसपोलं देसना यानाबिज्याःगु स्वीच्यागू मंगल सुत्र थौं नं यक्व यक्व हे ज्या वः नि । उकिं शील बांलाक पालना यानाः मांगालिक ज्या याये सयेके नु । अधर्मया ज्या मयासे कुशल कर्म जक याये सयेके नु ।

अन्त्यय् जिं धायेत्यनागु खँ थ्व खः कि अकुशल कर्म यायेगु त्वःते । बुद्धं झी गृहस्थपिनिगु लागिं देशना यानाबिज्याःगु शील न्यागू थथे दु – प्राणी हिंसा मयायेगु, कर्कियागु धन सम्पत्ति खुया मकायेगु, पर पुरुष–स्त्री गमन मयायेगु, मखुगु खँ मल्हायेगु व म्हय् लगे जुइगु पदार्थ मनयेगु । थुपिं न्यागू शील जक बांलाक पालना यानाच्वने फुसां झीगु आयु भचा ताहाकः यायेफइ धइगु खँय् निगू मत दइ मखु जुइ धइगु खँय् विश्वास दु ।

 

सम्बन्धित बुखँ

LEAVE YOUR COMMENTS