चिनियाँ तुलनाय् भारतीय ग्वाहालि म्हो

येँ (नेपालभाषा टाइम्स)÷ नेपाःया विकास निर्माणय् भारतीय ग्वाहालि म्हो जुया वनाच्वंगु खँ धाःगु दु । वंगु न्हय्दँया दुने नेपाःया विकासया निंतिं भारतं बिया वयाच्वंगु ग्वाहालि म्हो जूगु खः । मेखे चीनं बीगु ग्वाहालि धाःसा छुं भचा अप्वया वनाच्वंगु दु ।

न्हय्दँ न्ह्यः भारतं विकास सहायता स्वरुप नेपाःयात ३ करोड ४४ लाख डलर आर्थिक ग्वाहालि याःगु खःसा न्हय्दँ लिपा भारतया ग्वाहालि ८१ लाख डलर जक जूगु दु । न्हय्दँ न्ह्यः चीनं नेपाःया विकासया निंतिं ४ करोड १८ लाख डलर बिउगु खः ।

सूत्रया कथं वंगु न्यादँ न्ह्यवंनिसें चीनं स्थिर रुपं आर्थिक ग्वाहालि यानाच्वंगु दुसा भारतया ग्वाहालि झन म्हो जुया वनाच्वंगु दु । आर्थिक दँ २०६९÷०७० स छकः भारतं ६ करोड ३८ लाख डलर आर्थिक ग्वाहालि याःगु खः । थ्वहे भारतं नेपाःयात याःगु दकलय् अप्वः ग्वाहालि जूगु नं सूत्रं धाःगु दु । मेखे चीनं नेपाःया विकासय् याइगु ग्वाहालि धाःसा अप्वया वनाच्वंगु दु ।

वंगु आर्थिक दँय् चीनं नेपाःयात ५ करोड ५० लाख डलर तका ग्वाहालि याःगु खः । थ्व ग्वाहालि भुखाय् ब्वयेधुंकाः वःगु खः । तर भुखाय् ब्वयेधुंकाः भारतं गुलि ग्वाहालि यायेगु धकाः धाःगु खः । उगु ग्वाहालि धाःसा मवःगु जक मखु अखतं म्हो जुयावनाच्वंगु दु ।

भारतं नेपाःया विकास योजनाय् प्रत्यक्ष लगानी यानाच्वंगुलिं यानाः नं सरकारपाखें जुइमाःगु लगानी म्हो जुयाः भारतीय ग्वाहालि खनेमदुगु खँ नं सूत्रं धाःगु दु । सरकारी निकायपाखें वयेमाःगु लगानी दूतावासपाखें तप्यंक लगानी यायेगु प्रवृत्तिं नं भारतं याइगु ग्वाहालिइ लिच्वः लाकाच्वंगु दु । नेपाःया संविधानया धारा ५१ या प्रावधान कथं भारतं छुं नं कथंया परियोजनाय् प्रत्येक्ष लगानी यायेमदु । तर भारतं प्रत्यक्ष लगानी यायेगु ज्या धाःसा त्वःतूगु मदु ।

सूत्रंया कथं चिनिया ग्वाहालि सरकारी बजेट अन्तर्गत दुहां वयाच्वंगु दुसा भारतीय ग्वाहालि उकथं दुहां वयाच्वंगु मदु । वंगु दँय् भारतं याःगु ग्वाहालि विशेषत सडक पूर्वाधार दयेकेगु ज्या जक सिमित जुयाच्वंगु दु ।

भारतं नेपाःया विकासया निंतिं वयेगु ग्वाहालि जक म्हो जुयाच्वंगु मखु । नेपालय् भारतीय लगानी नं म्हो जुयाच्वंगु दु । भारतीय व्यापारीपाखे नेपालय् लगानी यायेगु ज्या तसकं म्हो जुयाच्वंगु दुसा मेखे चिनिया व्यापारीतय्सं नेपालय् लगानी अप्वयेका हयाच्वंगु दु ।

सम्बन्धित बुखँ

LEAVE YOUR COMMENTS