विश्वकप २०१८

धिमे धेंधेंबल्लाः कासाय् कंकेश्वरी दाफा खलः न्हाप

येँ(नेपालभाषा टाइम्स)/ किलाघः सांस्कृतिक पुचःया ग्वसालय् न्हापांगु येँ महानगरव्यापी मेयर्स ट्रफी चिग्वः धिमे कासाय् कंकेश्वरी दाफा खलः समाज, यतखा न्हाप लाःगु दु । येँ महानगर लागा दुनेया झिंन्हय्गू त्वाः, खलः, पुचलं ब्वति काःगु कासाय् ओमबहाः त्वाः खलः, ओमबहाः लिउ व धिमे गुथि खलः, परिवार बिज्यापूननि लियांलिउ लाःगु दु ।
कासाय् विजयी जुया जुयादीपिंत येँ महानगरपालिकाया प्रमुख विद्यासुन्दर शाक्यं ट्रफी, मेडललिसें दसिपौं लःल्हानादीगु खः । अथे हे ज्याझ्वःया मू प्रायोजक नबिल फाउन्डेशनपाखें न्हाप, लिउ व लियांलिउ लाःगु यात छसिकथं छगू लख, न्यय्द्वः व नीन्याद्वः तका दां लःल्हाःगु खः ।
स्वंगू चरणय् यानाः न्ह्याःगु ज्याझ्वःया उलेज्या यासें मूपाहां येँ महानगर प्रमुख शाक्यं थज्याःगु कासा दँय्दसं याना वनेमाःगु खँय् बः बियादिल । ज्या याइपिंत पिने च्वंपिंसं गबलें नं जस बीगु ज्या मजुइगुलिं ज्या यायेगु इच्छा दयां नं निरन्तरता बी मफया वनीगु खः धासें वय्कलं निरन्तर रुपं थज्याःगु ज्याझ्वः याना वनेमाःगु खँय् बः बियादिल ।
वय्कलं धयादिल, ‘कमसे कम नं ज्या याइपिंत थ्व मिले मजू, व याये मजिउ, थथे मयाःसा जिउ धकाः कुंखिनेगु जक मयासे फुसा थम्हं नं ग्वाहालि यायेगु मफुसा याःगु ज्या ठीक जू धकाः धायेगु यायेमाः ।’
अथे हे ज्याझ्वःया विशेष पाहां येँ महानगरपालिकाया उपप्रमुख हरिप्रभा खड्गी श्रेष्ठं परम्परागत लोकसंस्कृतिया बाजं संरक्षण व प्रवद्र्धनया निंतिं महानगरपालिकां बजेट व्यवस्था यायेत योजना दयेकाच्वनागु धासें उकिया निंतिं थीथी त्वाः, गुथि, खलः पुचः पुचः विभाजित जुयाः मखसे सकलें छगू हे थासय् मुनाः वयेत इनाप यानादिल ।
पुचःया नायः सानुकाजी महर्जनया सभापतित्वय् जूगु ज्याझ्वलय् थीथी सांस्कृतिक ज्याझ्वः नं न्ह्यब्वःगु खःसा नसाज्वलंया स्टल नं तयातःगु खः ।

सम्बन्धित बुखँ

LEAVE YOUR COMMENTS