विश्व सम्पदा दिवस छवाःयंकं थीथी ज्याझ्वः यासें हनीगु

येँ – विश्व सम्पदाया धलखय् लाःगु निगू थाय् हनुमानध्वाखा लाय्कूनिसें स्वयम्भू तक पदयात्रा जुइगु जूगु दु । अन्तर्राष्ट्रिय विश्व सम्पदा दिवसया सन्दर्भय् लाकाः हनुमानध्वाखानिसें स्वयम्भूतक ‘सम्पदा पदयात्रा’या नामं उगु पदयात्रा यायेत्यंगु खः ।

सम्पदा पदयात्राया मू ज्याझ्वः बैशाख ८ गते जुइगु खःसां व स्वयां छवाः न्ह्यः बैशाख २ गतेनिसें हे छवायंकं थीथी ज्याझ्वः यानाः विश्व सम्पदा दिवस हनेगु थन जूगु पत्रकार सम्मेलनय् जानकारी बिउगु दु ।अन्तर्राष्ट्रिय विश्व सम्पदा दिवस बैशाख ५ गते खःसां उकुन्हु सार्वजनिक विदा मदुगुलिं विदाया न्हि कुन्हु लाकाः फक्व अप्वः मनूतय्त सहभागि याकेगु ल्याखं बैशाख ८ गते शनिवाः मू ज्याझ्वः यायेत्यंगु खः ।

पत्रकार सम्मेलनय् विश्व सम्पदा उत्सव मूल समारोह समितिया संयोजक नापं येँ महानगरपालिकाया प्रमुख विद्यासुन्दर शाक्यं छगू विश्व सम्पदास्थल हनुमानध्वाखानिसें मेगु विश्व सम्पदास्थल स्वयम्भूतकया ऐतिहासिक महत्वया आपालं सम्पदा बारे नं जानकारी बीगु नापं उकिया संरक्षण, प्रवद्र्धन व प्रचार प्रसार यायेगु ल्याखं सम्पदा पदयात्रा यायेत्यनागु धयादिल ।

छवाःयंकं जुइगु सम्पदा पदयात्राया उलेज्या संस्कृति, पर्यटन तथा नागरिक उड्डयन मन्त्री रवीन्द्र अधिकारीं याइगु ज्याझ्वः दुसा उकिया समापन प्रधानमन्त्री केपी ओलीं यानादीगु पत्रकार सम्मेलनय् जानकारी बिउगु दु । येँ क्षेत्र नं ८या प्रतिनिधिसभा सदस्य नापं विश्व सम्पदा उत्सव मूल समारोह समिति निर्देशन समितिया संयोजक जीवनराम श्रेष्ठं प्राचीन इलंनिसें हे नेपाली कला, निर्माण शैली व बनोटया ल्याखं विश्वय् अतिकं लोकंह्वाःगु जूसां नं उकिया संरक्षणया अभावं पुलांगु सम्पदात जीर्ण जुया वनाच्वंगु धासें आःया अवस्थाय् सम्पदा पदयात्रां सम्पदा मार्ग दुनेच्वंगु थीथी सम्पदाया बारे जनचेतन अभिवृद्धि याइगु विश्वास प्वंकादिल ।

छवाःयंकं जुइगु विश्व सम्पदा उत्सवया ज्याझ्वःकथं २ गते सुचुकुचु, ३ गते विद्यार्थी सम्पदा पदयात्रा, ४ गते, थीथी कासा, ५ गते फोटो पत्रकारतय् निंतिं सम्पदा पदयात्रा, ६ गते हुलाक टिकटया ब्वज्या, ७ गते चित्रकला कार्यशाला गोष्ठि, व ८ गते सांस्कृतिक बाजं व झाँकी सहित मरु गणेद्यःया थासं स्वयम्भू तक पदयात्रा जुइ ।

पत्रकार सम्मेलनय् बिउगु जानकारी कथं मरु गणेद्यया थासं शुरु जुइगु उगु पदयात्रा मरुसतः, मरुहिति, सन्तानेश्वर महाद्यः, मरुबही, बन्जाःहिति, चस्वांद्वः, दमाइ त्वाः, न्यत अजिमा द्यःटेँ, लोकेश्वर मूर्ति, बुरांख्यः, म्येय्छ्यं हिति, भेलु महाद्यः, दलू चौतारा, निपुहिति, धिमय् ल्वहं जुयाः भुइख्यलय् थ्यंकाः क्वचाइ ।

हनुमानध्वाखानिसें स्वयम्भू तकया सम्पदा मार्ग च्वंपिं यक्वसिया मुख्य पेशा कृषि जूसां खेतीयोग्य जमीनया अभावं पेशा हे संकटय् लायेधुंकूगु अवस्थाय् आः सम्पदाया बारे प्रचार यायेगु नापं उगु थासय् पर्यटकतय्त आकर्षण यानाः न्हूकथं न्ह्याः वनेगु निंतिं हे थुगु ज्याझ्वः न्ह्यःने हयागु सांसद श्रेष्ठं ‘नेपालभाषा टाइम्स’यात जानकारी बियादिल ।

येँ मनपा प्रमुख शाक्यय संयोजकत्वय् येँ क्षेत्र नं ७ व ८ या प्रतिनिधिसभाया दुजः, प्रदेशसभाया दुजः, सम्बन्धित वडाया वडाअध्यक्षलिसें स्थानीय थीथी संघसंस्थाया प्रतिनिधिपिं दुथ्याःगु छगू आयोजक समिति नं गठन यानातःगु दु ।

सम्बन्धित बुखँ

LEAVE YOUR COMMENTS