विश्वकप २०१८

नेपाःया च्यायात व्यापारिक चिं

येँ (नेपालभाषा टाइम्स)/ नेपाली अर्थोडक्स च्यायात अन्तर्राष्ट्रिय बजारय् सहज रुपं थ्यंकेगु ताः तयाः स्वदँ न्ह्यः उद्योग विभागय् दर्ता याःगु व्यापारिक चिं कार्यान्वयनय् वयेवं राष्ट्रिय चिया तथा कफी विकास बोर्डं उगु चिं च्या उद्योगतय्त वितरण याइगु जूगु दु ।
नेपाली अर्थोडक्स चिया सर्टिफिकेसन ट्रेडमार्क कार्यान्वयन निर्देशिका २०७४ तयार जुइवं नेपाःया उत्पादनया आधिकारिक व्यापारिक चिं कार्यान्वयनय् वःगु खः ।
बोर्डया कार्यकारी निर्देशक शेषकान्त गौतमं उद्योगीतय्सं चिं कायेगु निंतिं बोर्डय् निवेदन बीमाःगु खँ धयादीगु दु । वय्कलं धयादीगु दु, ‘निवेदन बीधुंकाः निर्देशिका कथं च्याया उत्पादन जुयाच्वंगु, गुणस्तर दु मदु स्वयेगु निंतिं समिति दयेकातःगु दु । उगु समितिं स्थलगत निर्णय यायेधुंकाः निर्णय जुइ ।’
व्यापारिक चिं तुयुगु व हाकुगु रंगया पृष्ठभूमिइ सियुगु व तुयुगु रंगं निगू हिमालया आकार, अंग्रेजीं ‘नेपाल’ व अले वाउँगु रंगी ‘टी’ च्वयातःगु व थुकिया क्वय् खरानी वा तुयुगु रंगं ‘क्वालिटी फ्रम द हिमालयज’ धकाः च्वयातःगु दइ ।
उद्यमीतय्सं थुगु चिं कायेत धाःसा उलि अःपु जुइमखु । बोर्डया कार्यकारी निर्देशक गौतमया कथं, ‘रासायनिक विषादी छ्यलातःगु जुइमजिउ, मजदूरतय्सं च्या थ्वया काइबलय् गज्याःगु साधन छ्यलाच्वंगु दु, थ्वयाकायेधुंकाः इलय् कारखानाय् थ्यनाच्वंगु दु कि मदु फुक्कं स्वइगु जुइ ।’
गुणस्तरीय उत्पादनया निंतिं किसानतय् तह तक हे थकिं सचेतता हइगु चिया उद्यमी डिल्ली बाँस्कोटां धयादीगु दु ।
नेपाःया च्या भारतया मन्दीइ यंकाः दंगु भावं मी वनेमाःगु बाध्यताया दथुइ थुगु व्यापारिक चिंया कारणं अन्तर्राष्ट्रिय बजारय् नेपाःया च्यां नं बांलाःगु थाय् कायेफइगु खँ चिया उद्यमी बुद्ध तामाङं धयादीगु दु ।
आःतक गुगु गुगु देशय् नेपाःमि व्यवसायी थःम्हं हे चिया निर्यात यानाच्वंगु दु, उगु देशय् सरकारं तुरुन्त व्यापारिक चिं दर्ता यानाबीगु खँ राष्ट्रिय चिया तथा कफी विकास बोर्डं धाःगु दु ।
नेपालय् दँय् थ्यंमथ्यं ५० लाख केजी अर्थोडक्स चिया उतपादन जुयाच्वंगु दु ।

सम्बन्धित बुखँ

LEAVE YOUR COMMENTS