आर्थिक बृद्धिदर म्हो जुइगु

येँ – चालु आर्थिक दँय् नेपाःया आर्थिक वृद्धि म्हो जुयाः ४.९ प्रतिशतय् लिकुनीगु जूगु दु । एसियाली विकास बैंक (एडीबीं) बुधवाः चालू आर्थिक दँया परिदृष्य सार्वजनिक यासें आर्थिक वृद्धिदर म्हो जुइगु प्रक्षेपण याःगु खः । वंगु आवय् नेपाःया आर्थिक वृद्धिदर ६.९ प्रतिशत दुगु खःसा थुगु दँय् म्हो जुयाः ५ प्रतिशत स्वयां म्हो जुइगु एडीबीं अनुमान याःगु दु । सरकारं ७.२ प्रतिशत वृद्धिया लक्ष्य काःगुलिं पूवनीगु अवस्था खनेमदयेवं मध्यावधि मूल्यांकन यानाः ६ प्रतिशतय् लिकुनिगु अनुमान याःगु खः ।

एडीबीं सरकारं याःगु स्वयां म्हो जक आर्थिक वृद्धिदर हासिल जुइगु खँ धाःगु दु ।मुक्कं ग्राहस्थ उत्पादन (जीडीपी) इ छब्वः कृषि व औद्योगिक क्षेत्रय् मन्दी वइगु जूगुलिं मुक्कं आर्थिक क्षेत्रया वृद्धि म्हो जुइगु एडीबीया अर्थशास्त्री मानवरसिंह खड्कां कनादीगु दु । वंगु साउन महिनाय् तराइलय् वःगु खुसिबाः व डुबानय् लानाः वा उत्पादन १.५ प्रतिशतं म्हो जुइगु खँ वय्कलं कनादीगु दु ।

अथेहे उत्पादन उपक्षेत्रय् लगानी म्हो जूगुलिं औद्योगिक वृद्धिदर म्हो जुइगु जानकारी नं खड्कां बियादिल । अथेखःसां नं थोक व खुद्रा व्यापार विस्तार, वित्तिय मध्यस्थता व पर्यटन थेंज्याःगु उपक्षेत्रय् जूगु वृद्धिं सेवा क्षेत्र उत्साहजनक दुगु एडीबीया धापू दु ।
अथेहे चालु आवय् मूल्यवृद्धि ४.५ प्रतिशत जुइगु खँ धाःगु दु ।

मेगु दँय् थहां वनाः ५.५ प्रतिशत जुइगु एडीबीं प्रक्षेपण याःगु दु । थ्व मूल्यवृद्धि दर केन्द्रीय बैंकं निर्धारण याःगु स्वयां म्हो खः । केन्द्रीय बैंकं मूल्यवृद्धि दर ७ प्रतिशत जुइगु अनुमान यानातःगु दु । उकथं हे सरकारी खर्चय् व लगानीइ वःगु सुधारं चालू आवया आर्थिक वृद्धिदर थहां वनेफइगु अनुमान नं एडीबीं याःगु दु ।

सम्बन्धित बुखँ

LEAVE YOUR COMMENTS