रानीपुखू पुनःनिर्माणं गति काइला ?

येँ – ऐतिहासिक रानीपुखू पुनःनिर्माण सम्बन्धय् खने दयाच्वंगु विवाद छगू हदतकया निंतिं ज्यंगु दु । येँया नुगःचुया दथुइ च्वंगु ऐतिहासिक रानीपुखू पुनःनिर्माण सम्बन्धय् पुरातत्व विभाग व येँ महानगरपालिकाया दथुइ ताःई न्ह्यवंनिसें विवाद ब्वलनाच्वंगु खः । २०७२ बैशाख १२ गतेया तःभुखाचं क्षतिग्रस्त जूगु रानीपखू पुनःनिर्माण सम्बन्धय् विभाग व येँ मनपा दथुइ निर्माण सामग्रीया प्रयोगयात कयाः विवाद जुयाच्वंगु खः ।

निगू निकाय दथुइ ब्वलनाच्वंगु विवादया कारणं रानीपुखू पुनःनिर्माणं गति नं काये फयाच्वंगु मदु । महानगरपालिकां रानीपुखू दयेकेगु भाला कयाः पुखूया लः दक्वं वांछ्वयेगु नापं अनया संरचना तकं थुनाः पुनःनिर्माणया ज्या न्ह्याका वयाच्वंगु खः । तर पुनःनिर्माणय् आधुनिक निर्माण सामग्री छ्यःगु धासें विभाग व येँ मनपाया दथुइ विवाद ब्वलंगु खः । पुखू व अन दुनेया संरचना परम्परागत व प्रताप मल्लकालीन मौलिक शैलीं दयेकेगु खः वा आधुनिक शैलीइ दयेकेगु धइगु खँय् ताःई न्ह्यवंनिसें निगू निकाय दथुइ विवाद जुयाच्वंगु खः ।

थ्व विवादया दथुइ पुनःनिर्माणया सम्बन्धय् मेमेगु खँ नं थप विवादया विषयया रुपय् दुहां वयेवं पुनःनिर्माणया ज्यां गति काये मफुगु व ध्याकुनय् लाःगु जक मखु दथुइ छुं ई तक पुनःनिर्माण स्थगित तकं यायेमाःगु अवस्थाय् थ्यंगु खः ।
भुखाचं क्षति जूगु संरचना पुनःनिर्माणया निंतिं राष्ट्र प्रमुख विद्यादेवी भण्डारीपाखें थ्व हे रानीपुखुलिइ शुरुवातया उद्घोष यानादीगु खः । तर व हे रानीपुखू पुनःनिर्माणया इलंनिसें थौंतक नं विवाद जुयाच्वंगु दु ।

रानीपुखू पुनःनिर्माणय् सख्वाः, कंक्रिट, डन्डी, सिमेन्ट लगायतया आधुनिक निर्माण सामग्री छ्यलेगु येँ महानगरपालिकाया निर्णययात पुरातत्व विभागं मापदण्ड अःखः जूगु ठहर याःगु जक मखसे स्वयम महानगरपालिकाया नेतृत्व दुने नं निगू पुचलय् विभाजित जुयाबिल । महानगरपालिका प्रमुख विद्यासुुन्दर शाक्यं लगायत छगू पक्षं यानाच्वंगु ज्याया विरोधय् महानगरपालिकाया हे उपप्रमुख हरिप्रभा खड्गी पक्षं तालं ग्वया बिउगु जक मखसे पुखू जःखः दयेकाच्वंगु कंक्रिट व सिमेन्टया संरचना तकं थुनाबिल ।

थनं लिपा नं रानीपुखू पुनःनिर्माणया विवाद ज्यनेगु पलेसा गथे खः अथे हे थातिं लानाच्वन । गुकिं यानाः पुनःनिर्माणं गति काये फयाच्वंगु मदु । थनं लिपा विभाग व येँ मनपा दथुइ सम्बन्ध हे त्वाःदःगु थें जुल । रानीपुखूया अवस्थां नं गति काये मफुत । आः वयाः धाःसा पुरातत्व विभाग व येँ महानगरपालिकाया दथुइ छगू सहमति जूगु दु । निगू निकाय दथुइ जूगु थ्व सहमति धइगु हे विभागं न्हापांनिसें धया वयाच्वंकथं पुलांगु हे मौलिक शैलीं दयेकीगु जूगु दु ।

थ्व सम्बन्धय् संस्कृति, पर्यटन व नागरिक उड्डयन मन्त्री रवीन्द्र अधिकारीया अध्यक्षताय् च्वंगु बैठकं निकास मालेगु ज्या याःगु खः । येँ महानगरपालिका भौतिक पूर्वाधार विकास विभागया प्रमुख रामबहादुर थापां कनादीकथं ममन्त्री अधिकारीया अध्यक्षताय् च्वंगु बैठकं रानीपुखू पुनःनिर्माण सम्बन्धय् खने दुगु विवादया निकास मालेगु ज्या याःगु खः ।

सहमति कथं रानीपुखू दुने दयेकेधुंकूगु कंक्रिटया पःखाः लगायतया संरचना थुनेगु व हाकनं टेन्डर आह्वान याइगु जूगु दु । पुखू निर्माण यायेगु भाला येँ मनपाया हे जूगुलिं उकियात नं मौलिक शैलीं हे दयेकेगु सहमति जूगु थापां कनादीगु दु ।अथे हे पुनःनिर्माणया ज्या नं न्ह्याकेत निर्देशन बिउकथं वइगु जेठ १५ गते दुने कंक्रिटया पःखाः थुनाः मसान्तंनिसें प्रक्रियागत रुपं ठेक्का आह्वान याइगु जूगु दु ।

सम्बन्धित बुखँ

LEAVE YOUR COMMENTS