हवाई उद्योगय् चीनया प्रभाव

बिबिसी – चीन व अमेरिका दथुइ जुयाच्वंगु ‘व्यापार युद्ध’ या झ्वलय् चिनिया राष्ट्रपति सि जिनपिंगं थःगु देय्या अर्थव्यवस्थाया मेमेगु लुखा चायेका यंकेगु क्वःछिउगु दु । बोआओ फोरम फर एशिया सम्मेलनय् राष्ट्रपति जिनपिंगं धयादीगु दु, ‘चीन ट्रेड सरप्लसया निंतिं ब्वाँय् वनाच्वंगु मदु । जिपिं आयात अप्वयेके चाहे जुया व अन्तर्राष्ट्रिय भुगवानय् अप्वः सन्तुलन चाहे जुया ।’

छुं ई न्ह्यव निसें अमेरिका व चीन दथुइ व्यापार युद्ध तच्वया वनाच्वंगु दु, गुकी अमेरिकी राष्ट्रपति डोनाल्ड ट्रम्पं चीनं अमेरिका वनीगु गुलिखे उत्पादनय् कर अप्वयेका बीगु दुसा थुकिया लिसलय् जिनपिंगं नं अमेरिकां चीन वइगु तःगू उत्पादनय् कर अप्वयेकाबिउगु दु ।चीनया लँपु धाःसा आः हिला वनाच्वंगु दु । कडा व उदार कारोवार नीतिया निंतिं थ्व आवश्यक नं खः । तर थ्व दक्वंया दथुइ छगू थज्याःगु क्षेत्र नं दु, गन चीनं बुलुहुं बुलुहुं पलाः न्ह्याका यंकाच्वंगु दु, अले आः वयाः थुकी शीर्ष थाय् काइगु खनेदया वःगु दु ।

थ्व न्हूगु क्षेत्र खः हवाइ व्यवसाय । बेइजिङय् डेक्सिंग इन्टरनेशनल एयरपोर्ट तयार जुयाच्वने धुंकूगु दु । थ्व एयरपोर्ट चालेवं विश्वया हे दकलय् तःधंगु विमानस्थल जुइ । अले थ्व एयरपोर्ट पूरा क्षमताय् चले जुइवं विश्वया दकलय् व्यस्त एयरपोर्ट नं जुइ । थ्व एयरपोर्ट वइगु २०१९ सेप्टेम्बरं निसें चले यायेगु तयारी यानाच्वंगु दु । थ्व एयरपोर्टय् च्यागू रन वे दइ, अले दँय् झिगू करोड यात्रुयात थनं सेवा बी ।

चीनया एयरलाइन्सतय्सं गुगु गतिं यात्रुतलिसे स्वापू कायम याना वनाच्वंगु दु, उगु गति न्हापा गुबलें खनेमदुनि ।सन् २०१० निसें २०१७ तकया दुने चीनया स्वंगू तःधंगु एयरलाइन्सया यात्रुतय् ल्याः ७० प्रतिशतं अप्वयाः ३३ करोड ९० थ्यनेधुंकूगु दु । वंगु मार्चया अन्त तकया दुने चीनया दकलय् तःगु एयरलाइन्स चाइना साउर्थन व चाइना इस्टर्नं वार्षिक नाफाय् रेकर्ड कायम याःगु दु ।थौंकन्हय् इमिरेट्स, इतिहाड व कतार एयरवेज थेंज्याःगु खाडी देय्या एयरलाइन्सतय्सं विश्वन्यंकं तहलका न्यायेकाच्वंगु दु ।

तर आः स्थितिइ हिउपाः वइगु खनेदयावःगु दु । चिनिया कम्पनीतय् पपू चकना वनाच्वंगु दु, गुकी दँय् १० प्रतिशत ग्रोथ यायेगु लक्ष्य तयातःगु खाडीया विमान कम्पनीतय् धरमरय् जुया वनाच्वंगु दु ।चीनिया कम्पनी लगातार अप्वया वयेवं खाडी कम्पनीतय् नाफा सीमित जुया वनाच्वंगु दु ।सन् २०१७ य् चीनं उडान याइपिं यात्रुतय् ल्याः १८ करोड ४० लाख दुगु खः तर आःतकया दुने थ्व तथ्यांक अप्वया ५४ करोड ९० लाख थ्यं वयेधुंकूगु दु ।

इन्टरनेशनल एयर ट्रान्स्पोर्ट एशोसियसनया अनुमान कथं सन् २०२२ तकया दुने चीनया हवाइ व्यापार अमेरिका स्वयां तःधंगु जुइ, अले सन् २०३६ तकया दुने चीनं हवाइ यात्रा याइपिं यात्रुतय् ल्याः १ अर्ब ५० करोड थ्यंवइ । चीनया विमान उद्योग छुं लिबाक जक जुरु जूगु खः, तर डेंग सियाओपिंगया आर्थिक सुधारया लिसें थ्व उद्योगया निंतिं नं लँ चालावंगु खः ।

विश्लेषकतय् कथं चीनं वइगु नीदँय दुने थ्यंमथ्यं छगू लाख करोड डलर बराबरया विमान न्याइतिनि । बोइंगं बी७३७ फिनिशिंग फ्याक्ट्री दयेके धुंकूगु दुसा एयरबसं ला चीनय् ए ३२०या फाइनल असेम्बल प्लान्ट हे तयार यायेधुंकूगु दु । चीनया थ्व पलाखं क्षेत्रीय कम्पनीतय् नं भुइचःति हायाच्वंगु दु । मलेसिया एयरलाइन्स मेमेगु कारणं नं समस्याय् लानाच्वंगु दुसा क्याथ प्यासेफिक थेंज्याःगु कम्पनीं थःगु लबः सीमित यायेमालाच्वंगु दु ।

सम्बन्धित बुखँ

LEAVE YOUR COMMENTS