सक्वया पुनःनिर्माण नेवाः पहलं

सक्व –  २०७२ सालया तःभुखाचं ध्वस्त जूगु सक्वया नेवाःतय् पुलांगु वस्ती नेवाः पहलं हे पुनर्निर्माण जुयाच्वंगु दु । वस्ती पुलांगु नेवाः शैलीं हे दयेकेगु ज्या न्ह्यानाच्वंगु खँ शंखरापुर नगरपालिकाया मेयर सुवर्ण श्रेष्ठं कनादिल । तःभुखाय् ब्वयेधुंकाः छुं ई थःपिनि च्वनेगु थाय् मदयेवं गथे यानाः छेँ दनेगु धकाः जनता अलमल जुयाः छुं छुं छेँ नेवाः परम्परा स्वयां बिस्कं दयेकूगु खःसां स्थानीय पदाधिकारीपिं वयेधुंकाः थःपिंसं स्थानीय जनतायात नेवाः शैलीं हे छेँय् दयेकेमाःगु खँ थुइकागु व आः स्थानीय जनतां पुलांगु शैलीं हे छेँ दनेगु यानाच्वंगु खँ वय्कलं कनादिल ।

तःभुखाय् लिपा सक्वयात नं सरकारं सम्पदा क्षेत्रय् लाःगु धकाः घोषणा यायेवं आपालं मनूत दुनावंगु छेँ दयेकेत छु यायेगु धइगु मसियाः अलमल जूगु खँ कनादिसें वय्कलं थःपिंसं पुलांगु शैलीं छेँ दनेबलय् दीर्घकालीन रुपं फाइदा दइगु जक मखु स्थानीय तह पाखें पुलांगु शैलीं छेँ दनीपिंत छगू लाख तका व सरकारपाखें नं ५० द्वः तका ग्वाहालि बीगु क्वःछीवं स्थानीयत पुलांगु शैलीं हे छेँ दनेत उत्साहित जूगु खँ नं वय्कलं कनादीगु दु ।

सरकारं सक्व देय्यात सम्पदा वस्ती कथं घोषणा यानातःगु दु । उकिं नं सम्पदा विपरित छेँ दनीपिंत सरकारं बीगु स्वंगू लाख तकाया अनुदान नं मबीफुगुु सुचं पिकायेवं पुलांगु शैलीं छेँ दनेत स्थानीय जनता तयार जूगु खः ।मेयर श्रेष्ठया कथं आः गुलिं नं छेँ दयेकेगु धकाः वयाच्वंपिं दु, उपिं मध्ये ६० निसें ७० प्रतिशत पुलांगु शैलीं छेँ दयेकेत तयार जुयाच्वंगु दु । वय्कलं बियादीगु जानकारी कथं पुलांगु शैली छेँ दयेकेबलय् सटर तयेमदु, लुखा व झ्याः सिँयागु तयेमाः, पौ नं पुलांगु शैलीं हे तयेमाःगु व्यवस्था यानातःगु दु । थथे यानाः छेँ दनीपिंत नक्सा पास नं निःशुल्क यायेगु व्यवस्था नगरपालिकां यानातःगु दु ।

अथेहे छेँ दनेत माःगु सल्लाह नं नगरपालिकाया प्राविधिकपिंसं बियाच्वंगु खँ कनादिसें मेयर श्रेष्ठं कनादिल, ‘तःभुखाय् लिपा इन्जिनियरतय्सं नक्सा दयेकेत यक्व ध्यबा कायेगु यानाच्वंगु खः । तर नगरपालिकां निगू कन्सल्टेन्सी नाप सम्झौता यानाः छगू नक्सा दयेकेगु निंतिं १ हजार निसें ५ हजार तका जक कायेगु कथं व्यवस्था याना बियागु दु ।’ पुलांगु शैलीं छेँ मदयेकल धाःसा नगरपालिकां नक्सा पास याइमखु । नक्सा पास मजुल धाःसा छेँ बरः तयाः त्यासा कायेत व मीत समस्या जुइगु जुयाः नं आपालं स्थानीय जनता पुलांगु शैली छेँ दयेकेत तयार जूगु खँ नं मेयर श्रेष्ठं कनादिल ।

वय्कलं धयादी, ‘पुलांगु शैली छेँ दयेकेत जिमिसं बाध्यकारी नियम दयेकाःगु दु धाःसां जिउ ।’ वय्कलं कनादी कथं छेँ जक पुलांगु शैलीं दयेकेगु मखुसे पुलांगु सँझ्याः, तिकिझ्याः आदि नं अनिवार्य रुपं तयेमाःगु व्यवस्था यानातःगु दु । ‘पुलांगु झ्याः धयागु झीगु म्हसिका खः थुकियात न्हंके मजिउ धकाः संरक्षण यायेगु कथं पुलांगु हे झ्याः तयेमाःगु व्यवस्था यानागु खः’ वय्कलं कनादी ।पुलांगु कथं हे पुनर्निर्माणया क्वचाल धाःसा भविष्यय् सक्व देय्यात पर्यटकीय क्षेत्र कथं विकास याये फइ । ‘थन सम्भावना यक्व दु, तर नं थन पर्यटनया विकास याये फयाच्वंगु मदुनि ।

अथे जुयाः थन होमस्टे यायेफइकथं नगरपालिकां योजना दयेकाच्वनागु दु ।’ सक्व देय्यात पर्यटकीय क्षेत्र कथं विकास याये फतधाःसा आपालं समस्या ज्यनीगु खँ कनादिसें आर्थिक रुपं विपन्न जनतायात नं ग्वाहालि जुइकथं थीथी योजना दयेकाच्वनागु खँ नं वय्कलं कनादिल । वज्रयोगिनी व मणिचुड डाँडायात आन्तरिक व बाह्य पर्यटकीय क्षेत्र कथं विकास यायेगु तयारी जुयाच्वंगु दुसा येँ नं सक्व जुयाः नगरकोट वनेगु सतक दयेकेगु तयारी नं जुयाच्वंगु खँ वय्कलं कनादिल ।

सम्बन्धित बुखँ

LEAVE YOUR COMMENTS