टीकापुरय् ज्वना तःपिं थारूतय् छेँजःपिं अलपत्र

येँ – वंगु वि.सं. २०७२ साल भदौया ७ गते कैलालीया टीकापुरय् च्याम्ह प्रहरीया ज्यान वंक जूगु घटनाय् ल्हाः दुपिं धकाः ज्वनातःपिं स्थानीय थारूतय् छेँजःपिं थौंकन्हय् अलपत्र अवस्थाय् लानाच्वंगु खँ सीदुगु दु । थ्व घटनाय् ल्हाः दुपिं धकाः प्रहरीं २६ म्ह स्थानीय थारूतय्त ज्वनाः कुना तःगु दु । वंगु चुनावय् अत्यधिक मत हयाः त्याःम्ह सांसद रेशम चौधरीयात तकं सरकारं आः तक ज्वनाः त्वःतूगु मदुनि ।

थ्व झ्वलय् थःपिनि छेँजःयात ज्वना तःगुलिं उमित न्याय बी माल धकाः उमि छेँय् च्वंपिं थःथितिपिं राजधानी येँय् वयाः थीथी थासय् धाः वनाच्वंगु खँ सदिुगु दु । गन न्ह्याथाय् धाः वंसां उमिगु खँ सुनां नं मन्यंगुलिं उमिसं येँय् छगू पत्रकार सम्मेलन यानाः थःपिनि दुःख प्वंकेगु ज्या याःगु दु ।

टीकापुरय् भदौ ७ गते उगु काण्ड जुइधुंकाः वयां कन्हय् कुन्हु हे प्रशासनं कफ्र्यु तयातःगु इलय् अन च्वंपिं आपालं थारूतय्गु छेँ तोडफोड यायेगु लिसें पसः लुटे यायेगु ज्या जूगु खँ उमिसं कंगु दु । उगु इलय् लुटपाट जुयाच्वंगु खंसां नं प्रहरीं बचे याः मवःगुलिं थ्व ज्याय् प्रहरीया समेत ल्हाः दयेमाः धकाः नं उमिसं द्वपं बिउगु दु ।

आः ज्वनातःपिं मध्ये श्रवण चौधरी छम्ह नाबालिग जूगु व करण चौधरी नांयाम्ह छम्ह मानसिक सन्तुलन मदुम्ह जूगुलिं उमित जेलय् मतसे सुधारगृहय् छ्वया बी माल धकाः इनाप यानां नं वास्ता मयाःगु खँ छेँजःपिंसं धाःगु दु ।

टीकापुर काण्डय् ल्हाः दु धकाः आः ज्वनातःपिं सकलें निर्दोष जूगु खँ उमिसं धाःगु दु । थ्व काण्डयात कयाः सरकार थम्हं हे गठन याःगु उच्चस्तरीय आयोग व राष्ट्रिय मानव अधिकार आयोगं गठन याःगु छानबिन समितिया रिपोर्ट तकं सरकारं आः तक सार्वजनिक मयाःगुलिं उकियात सार्वजनिक यायेत नं छेँजःपिंसं इनाप याःगु दु ।

येँय् नं अलपत्र हे

थःपिंत दुःख जूगु बारे जानकारी बीत येँय् वयाच्वंपिं थ्व थारू परिवारत थन नं च्वनेगु थाय् मदयाः उखेंथुखें च्वनेगु यानाच्वंगु खँ सीदुगु दु । थःगु दुःख कने धकाः उपिं हुल मुनाः येँय् ला थ्यंकः वल, तर थन नयेगु त्वनेगु व च्वनेगु तक नं ठेगान मदयाः गबलें गन गबलें गन च्वनेगु यानाच्वंगु दु । उमित थनया छुं मानव अधिकार सम्बन्धी संगठन व थारू संस्थातय्सं सामान्य ग्वाहालि याःसां व प्रयाप्त मजूगु खँ पीडिततय्सं धाःगु दु । येँय् अलपत्र जुइ धकाः उपिं सकलें छथासं जक च्वनेगु यानाच्वंगु दुसा गुलिसिनं थः च्वंच्वनागु थाय्या नां तकं काये मसःगु नं सीदुगु दु ।

सम्बन्धित बुखँ

LEAVE YOUR COMMENTS