विश्वकप २०१८

राजधानीया पीच अझ लिहां वन

मेलम्चीया लः नं न्हय्ला लिपा जक वइगु

येँ (नेपालभाषा टाइम्स) – मेलम्चीया पाइप तयेगु लागिं धकाः राजधानीया दुने दुने लागाय् म्हुया तःगु गाः अझ हे छुं ई पीच मयाइगु जूगु दु । थौंकन्हय् तसकं चिकुसे च्वं धकाः ठेकेदारं लँ पीच मयासे त्वःता तःगु कारणं पीचया ज्या लिबाःगु खँ सूत्रं धाःगु दु ।
उकिसनं आः थ्वहे वैशाखंनिसें लः छ्वा हयेगु धकाः बय्बय् जुयाच्वंगु मेलम्ची परियोजना हानं लिज्याइगु जुइवं लँ पीच यायेगु ठेक्का कयातःम्ह ठेकेदारयात झन् हे राहत चूलाः वंगु खँ नं धाःगु दु ।
लँ पीच याये धुनेवं उकी निभालं खयेकाः क्वाः लाके माःगु व अले मयात धाःसा याकनं हे पीच लिहां वयेफु धकाः ठेकेदारं पीच मयाःगु खँ येँ मनपा सूत्रं धाःगु दु ।
आः मेलम्ची परियोजना हे लिहां वंगु जूगुलिं लँ पीच यायेगु ज्या झन् हे लिबाः वनीगु अनुमान सूत्रं याःगु दु । थुकिं यानाः येँय् धू नं अझ हे मेगु खुला न्हय्ला ब्वयां तुं च्वनीगु सम्भावना नं अप्वया वःगु दु ।
सरकारं थ्वहे वइगु वैशाखंनिसें लः छ्वया हयेगु धकाः धाःसां नं सुरुङ म्हुइगु ज्या अझ हे क्वमचाःनिगु जुयाः मेगु खुलानिसें न्हय्ला तक नं लः छ्वया हये मफइगु जनाउ बिउगु दु ।
मेलम्चीया २७ किलोमिटर ताःहाकःगु सुरुङ आः मुक्कं ४१२ मिटर जक म्हुइ ल्यं दनि । तर थ्व लागाया ल्वहं तसकं नाइसेच्वंगु व ठेकेदारयाके आधुनिक उपकरण मदुगु जुयाः न्हिं ३ मिटर स्वयां अप्वः म्हुइ फयाच्वंगु मदु । सुरुङ म्हुइ सिधयेकाः ल्यं दुगु ज्या सिधइबलय् म्होतिं नं खुला निसें न्हय्ला बीगु खँ धाःगु दु ।

सम्बन्धित बुखँ

LEAVE YOUR COMMENTS