ख्वनाय् निगूगु चरणया आन्दोलन तयारी
येँ – फास्ट ट्राय्यकया लिसें राष्ट्रियस्तरया थीथी च्यागू योजना हयाः ख्वनाया स्थानीय जनतायात विस्थापित यायेत्यंगु धासें आन्दोलन याना वयाच्वंगु नेपाल सांस्कृतिक पुनर्जागरण अभियानं आः प्यन्हु लिपा च्वनीगु मुँज्यां निगूगु चरणया आन्दोलन घोषणा यायेगु तयारी यानाच्वंगु दु ।
संस्थाया नायः असोज डंगोलं आन्दोलन यायेगु तयारी जुयाच्वंगु खँ कनादिसें उगु जानकारी बियादीगु दु । वय्कलं न्हापांगु चरणया आन्दोलन क्वचाःगु व निगूगु चरणया आन्दोलन यायेमाःगु खँ धयादीगु खः ।
वंगु चैत २० गते सेना व अभियानया न्ह्यलुवातय् दथुइ सहलह जूगु खःसां नं सेनां उकियात माने मयाःगु खँ धाःगु दु । उकिं थःपिंसं मेगु आन्दोलनया घोषणा यायेत तयारी यानाच्वनागु जानकारी वय्कलं बियादीगु दु ।
थःपिंसं तत्काल सेना अनं लित यंकेमाःगु व सेनाया मार्फत जुयाच्वंगु मुआब्जा वितरण यायेगु ज्या तत्काल दिकेमाः धकाः सेना समक्ष माग तयागु खःसां नं सेनां उगु खँ माने मजूगु खँ कनादिसें निगूगु चरणया आन्दोलनया विकल्प मदुगु खँ कनादीगु दु ।
आः न्ह्याइगु आन्दोलनया स्वरुप गज्याःगु जुइ धकाः ‘नेपालभाषा टाइम्सं’ न्यनागु न्ह्यसलय् वय्कलं आः सहलह लिपा जक गुकथं न्ह्याःवनेगु धइगु खँ सीदइ धयादिल ।
सरकारं फास्ट ट्राय्यक, स्मार्ट सिटी, विद्युतया हाइटेन्सन तार लाइगु लिसें थीथी च्यागू परियोजना दयेकेगु कथं ख्वनाया खालीगु जग्गाय् सेना तैनाथ याःगु खःसा स्थानीय जनतां अन निन्हु तक धर्ना बियाः विरोध प्वंकूगु खः । ख्वनाय् थौंकन्हय् प्रदर्शन व सेनाया तैनाथी जारी हे दु ।
LEAVE YOUR COMMENTS