प्रधानमन्त्री ओलीयात न्हूदिल्लीइ भारतीय गृहमन्त्रीया लसकुस
येँ– भारत भ्रमणय् झाःम्ह प्रधानमन्त्री केपी ओलीयात न्हूदिल्लीइ भारतीय गृहमन्त्री राजनाथ सिंहं लसकुस याःगु दु । प्रधानमन्त्री थौं सुथय् ५४ म्ह दुजः दुगु प्रतिनिधि मण्डलसहित भारत भ्रमणय् झाःगु खः ।
नेपाल वायुसेवा निगमया नियमित उडानं भारत झाःम्ह प्रधानमन्त्रीयात न्हूदिल्लीया इन्दिरा गान्धी अन्तर्राष्ट्रिय विमानस्थलय् गृहमन्त्री सिंहं लसकुस याःगु खः ।
भारतीय प्रधानमन्त्री नरेन्द्र मोदीया ब्वनाय् स्वन्हुयंकंया भ्रमणय् झाःम्ह प्रधानमन्त्री ओलीं कन्हय् जक थः समकक्षी मोदीयात नापलानादी ।
प्रधानमन्त्रीया ओलीया लिसें वय्कःया तिरिमय्जु राधिका शाक्य, परराष्ट्रमन्त्री प्रदीपकुमार ज्ञवाली, उद्योग वाणिज्य तथा आपूर्तिमन्त्री मातृकाप्रसाद यादव, भौतिक पूर्वाधार तथा यातायात मन्त्री रघुवीर महासेठ प्रधानमन्त्रीया मुख्य सल्लाहकार विष्णुप्रसाद रिमाल, सांसद्पिं शरतसिंह भण्डारी, दीनानाथ शर्मा, रामेश्वर राय यादव, मोतिलाल दुगड, गणेशसिंह ठगुन्ना, शान्ता चौधरी, उमा रेग्मी, रामवीर मानन्धर, सीताराम महतो व विमलप्रसाद श्रीवास्तव भ्रमणदलय् दु ।
प्रतिनिधिमण्डलय् अथेहे मुख्यसचिव लोकदर्शन रेग्मी, परराष्ट्र सचिव शंकरदास बैरागी, उद्योग, वाणिज्य तथा आपूर्ति मन्त्रालयया सचिव चन्द्रकुमार घिमिरे, नेपाल लगानी बोर्डष प्रमुख कार्यकारी अधिकृत महाप्रसाद अधिकारी, प्रधानमन्त्रीया निजी चिकित्सक डा दिव्यासिंह शाह, प्रधानमन्त्रीया प्रेस सल्लाहकार कुन्दन अर्याल व प्रधानमन्त्रीया स्वकीय सचिव राजेश बज्राचार्य नं दुथ्याः ।
LEAVE YOUR COMMENTS