पुखू संरक्षणया निंतिं ल्याय्म्हतय् अभियान

थिमि – मध्यपुर थिमि नगरपालिकाय् च्वंगु नांजाःगु विष्णु कुण्डया जिर्णोद्वार शुरु जूगु दु । मल्लकालीन ईया अतिकं प्रसिद्ध उगु धार्मिक कुण्ड स्थानीय ल्याय्म्हत जानाः जिर्णोद्वारया ज्या न्ह्याकूगु खः ।मध्यपुर थिमि लागाय् च्वंगु ऐतिहासिक, पुरातात्विक, धार्मिक व सांस्कृतिक ल्याखं महत्वपूर्ण पुखूया संरक्षण यायेगु निंतिं अभियान हे न्ह्याका वयाच्वंपिं ल्याय्म्हतय्सं विष्णु कुण्डया नं जिर्णोद्वारया ज्या न्ह्याकूगु खः । मध्यपुर थिमिया स्थानीय ल्याय्म्हतय्सं छगू समिति हे गठन यानाः थ्व ज्या न्ह्याकूगु खः । स्थानीय ल्याय्म्हतय्सं विष्णु कुण्ड पुखू संरक्षण शिविर समिति गठन यानाः पुखूया जःखः सुचुकुचु यायेगु नापं जिर्णोद्वारया ज्या न्ह्याकूगु खः ।

समितिया अध्यक्ष उज्जल श्रेष्ठं न्ह्यःने वयाच्वंगु बिस्का जात्रा स्वयां न्ह्यः हे पुखूयात पुलांगु हे संरचनाय् हयेगु ल्याखं शनिवाःपतिक सुचुकुचु यायेगु ज्या न्ह्याका वयाच्वनागु व वंगु शनिवाः सुचुकुचु यायेगु नापं पुखूया जिर्णोद्वार यायेगु ज्या नं न्ह्याकूगु जानकारी बियादिल । ल्याय्म्हतय्सं पुखू सुचुकुचु यायेगु झ्वलय् पुखुलिइ च्वंगु झाः चिइकेगु, ल्हानाच्वंगु पुखू सुचुकुचु यायेगु नापं पुखुलिइ वनेगु स्वाहाने त्वाथः दयेकेगु, दुनाच्वंगु पःखाः मल्लकालीन शैलीं हे जीर्णोद्वार यायेगु ज्या जुयाच्वंगु समितिया सचिव विश्व श्रेष्ठं कनादिल ।

मल्लकालीन इलय् निर्माण जूगु धयातःगु पुखू सुचुकुचु व संरक्षण यायेगु ज्या मजूगुलिं पुखू ल्हाना वनाच्वंगु खः । लिपांखुसी २०५४ सालय् तकः सुचुकुचु याःगु पुखू वयां लिपा संरक्षणया अभावं जीर्ण अवस्थाय् थ्यनाः ल्हाइगु स्थितिइ तकं थ्यने धुंकूगु खः । आः सुचुकुचु लिपा पुखूया संरक्षणया निंतिं पुखूलिक्कं च्वंगु राजकुलोय् पाइप तयेगु प पुखू जःखः पःखाः दनेगु तयारी जुयाच्वंगु दु ।थ्व हे झ्वलय् मध्यपुर थिमि नगरपालिकाया प्रमुख मदनसुन्दर श्रेष्ठं पुखू जिर्णोद्वारया निंतिं नगरपालिकापाखें ३३ गू लाख तका अनुदान ग्वाहालि यानागु जानकारी बियादिल । नगरपालिकाया ग्वाहालि नापं २० प्रतिशत जनश्रमदानपाखें पुखूया जिर्णोद्वार यायेगु ज्या जुयाच्वंगु दुसा थिमिया हे नांजाःगु निगू पुखू लगायत मेमेगु पुखूया नं संरक्षण अभियान शुरु जूगु दु ।

सम्बन्धित बुखँ

LEAVE YOUR COMMENTS