कम्प्लेक्सया जग्गा हे विवादय्

खालीगु जग्गाय् गुथि संस्थानया छेँ दनेगु कुतः

येँ÷धरहराया दक्षिणपाखें च्वंगु खाली जग्गाय् गुथि संस्थानं कम्प्लेक्स दयेकेगु ज्या शुरु यायेवं उगु जग्गा वास्तवय् सुयागु खः धइगु मेगु विवाद नं पिहां वःगु दु । स्थानीय कल्याणवरसिं थापाया कथं उगु जग्गा वय्कःया पुर्खाया नामय् दुगु खःसा वि.सं. २०३९ सालय् दरवार नाप सतीम्ह विजय राणां थःगु जग्गाया न्ह्यःने लाःगु सतः थुना बिउगु खः ।९ आना १ पैसा १ दाम दुगु उगु सतःया जग्गाय् कित्ता नम्बर ५१० व थुकिया थुवाः कथं नेत्रकुमारी थापा, भैरववरसिं थापा, केशरवरसिं थापा, मोहनवरसिं थापा व सूर्यवरसिं थापाया नां दुथ्याकातःगु दु । जग्गाया लालपूर्जा थःपिनिगु नामय् दुगु खःसां अन गुथि संस्थानं गय् यानाः छेँ दनेत्यन धइगु न्ह्यसः वय्कलं तयादीगु दु ।

मेखे गुथि संस्थानया प्रवक्ता सरोज थपलियां धाःसा जग्गा गुथि संस्थानया हे नामय् दुगु दावी यानादीगु दु । वय्कलं धयादी, ‘झिंन्यादँ तक मुद्दा ल्वानाः आः जग्गा गुथि संस्थान अन्तर्गत वःगु दु, उमिके दुगु लालपूर्जा पुलांगु खः ।’थापां धाःसा गुथि थःपिनिगु निजी खःसां दाजु किजाया ल्वापुं यानाः उगु जग्गा दावी यायेमखंगु खँ कँसें आः थःपिंसं उगु जग्गा सार्वजनिक कथं त्वःता बीधुनागु खँ कनादिल । वय्कःपिंसं सार्वजनिक कथं त्वःता बिउगु उगु खुल्ला जग्गाय् हे आः गुथि संस्थानं छेँ दनाः पसः बालं बीत्यंगु खः ।

उगु जग्गाय् कम्प्लेक्स दयेके मजिउ धासें वय्कलं भुखाचं दुनावःगु धरहरा आः गथे खः अथेहे संरक्षण यायेगु निंतिं नं आः खाली दुगु जग्गाय् छुं नं कथंया संरचना मदयेकुसे अथें त्वःता तयेमाःगु बिचाः तयादिल । उगु जग्गाय् न्हापा नं छकः छेँ दनेत स्वःबलय् तत्कालीन ११ वडाया अध्यक्ष हिरालाल तण्डुकारं पना बिउगु खँ नं वय्कलं कनादिल । उखे गुथिया प्रवक्ता थपलियां धाःसा संस्थानया आर्थिक स्रोत मदुगुलिं गुथिया जग्गा बालं बियाः स्रोत जुटे यायेमाःगु खँ कँसें जात्रा पर्व न्ह्याकेत नं थज्याःगु जग्गा बालं बीमाःगु जिकिर यानादिल ।

थौंकन्हय् लँ तब्या यायेगु नामय् सरकारं सर्वसाधारण जनताया छेँ तकं थुनाच्वंगु इलय् स्वयम् सरकारया हे छगू निकायं धाःसा खुल्ला जग्गाय् छेँ दनेगु ज्या यायेत्यन धकाः स्थानीय जनतां नं छेँ दनेगु ज्यायात पना बिउगु खः । थ्व बारे थपलियां यदि सरकारं लँ मगात धाल धाःसा उगु जग्गा त्वःता बीगु खँ कनादिल । अन पसः तयाच्वंपिंत किउगुलिं जक विवाद वःगु खः धासें वय्कलं स्थानीय जनता, मनपा वा वडापाखें छुं हे कथंया अवरोध मवःगु खँ कनादीसां स्थानीय वडा कार्यालयं धाःसा अन छेँ दने मबीगु खँ धायेधुंकूगु दु ।

सम्बन्धित बुखँ

LEAVE YOUR COMMENTS