भ्यू टावर क्वःछिनातःगु इलय् सिमधइगु निश्चित

येँ – थनया पुलांगु बसपार्कय् दयेकाच्वंगु अत्याधुनिक ‘काठमाडौं भ्यू टावर’ क्वःछिनातःगु इलय् सिमधइगु जूगु दु । येँ महानगरपालिकाया स्वामित्वय् पुलांगु बसपार्कय् दयेकाच्वंगु भ्यू टावर क्वःछिनातःगु इलय् सिमधइगु निश्चित जूगु दु ।
थनिं स्वदँ न्ह्यः येँ मनपां पुलांगु बसपार्कयात खुल्लामंचय् ल्ह्ययाः उगु थासय् भ्यु टावर दयेकेगु निंतिं जलेश्वर स्वच्छन्द विकोइ विल्ड नापं छगू सम्झौता याःगु खः । न्यादँया दुने निर्माणया ज्या क्वचायेकेमाःगु सम्झौताय् न्ह्यथनातःगु दु । टावर निर्माणया निंतिं थौंकन्हय् न्हिं ५० म्ह कामदार तयाः ज्या यानाच्वंसां क्वःछिनातःगु इलय् धाःसा सिमधइगु निश्चित जूगु दु ।

येँ मनपाया सार्वजनिक–निजी–साझेदारी (पीपीपी) इकाई प्रमुख महेश काफ्लेया कथं तसकं सुस्त गतिं ज्या न्ह्यानाच्वंगुलिं क्वःछिनातःगु इलय् निर्माण सिमधइगु निश्चित जूगु दु । भ्यु टावर निर्माणया निंतिं थौंकन्हय् न्हापांगु चरणया ज्याकथं पिल्लरया निंतिं ज्या जुयाच्वंगु दु । न्हापां नीगुतँजाःगु दयेकेगु धकाः तयारी याःगु खःसां २०७२ सालया तःभुखाय् लिपा १२ तँजाः जक दयेकेगु क्वःछिउगु खः । करिब २३ रोपनी ५ आना जग्गाय् दयेकेत्यंगु उगु टावर पीपीपीया थीथी ढाँचा मध्ये संरचना निर्माण लिपा ३० दँ तक निर्माण पक्षं संचालन याये धुंकाः येँ मनपायात लःल्हाइ । लुमंकेबहजू, उगु थासय् टावर निर्माण मयायेत छथ्वः सम्पदाप्रेमीतय्सं ब्यापक रुपं विरोध नं याःगु खः ।

सम्बन्धित बुखँ

LEAVE YOUR COMMENTS