थनिंनिसें कोटेश्वरं पूर्व यातायात बन्दया ख्याच्वः

येँ – भोंतया यातायात व्यवसायी व सरकार दथुइ खँ मिले मजुल धाःसा थनिंनिसें येँनं ख्वप व भोंतया फुक्क हे गाडी बन्द जुइगु जूगु दु । सरकारं मयूर यातायात नांगु छगू न्हूगु कम्पनीयात गाडी चले यायेगु अनुमति बिल धकाः उगु रुटया मेपिं यातायात व्यवसायीतय्सं हडताल स्वरुप गाडी बन्द यायेगु ख्याच्वः बिउगु खः ।

तर सरकारं नं व्यवसायीया न्ह्यःने झुके मजुसे यदि गाडी चले मयात धाःसा सुनां सुनां चले मयाःगु खः उमिगु रुट परमिट खारेज यायेगु जुइ धकाः ख्याच्वः बिउगु दु । म्हीग जूगु यातायात व्यवस्था विभागया बैठकय् नं गाडी चले मयात धाःसा रुट परमिट हे खारेज याना छ्वयेगु निर्णय जूगु खः ।

यातायात व्यवसायीतय्सं सांकेतिक हडतालया रुपय् म्हिगः व म्हीग नं घौछि घौछि गाडी चले मयाःगु खः । तर उगु इलय् नं मयूर यातायातया गाडी चले जूगु खः । मयूरया गाडीयात स्थानीय जनतां हे स्कर्टिङ यानाः न्ह्यःने यंकूगुलिं गनं छुं आक्रमण तकं याये मफुगु खः । स्थानीय जनताया थ्व समर्थनं यानाः थःपिंत अझ उत्साह वःगु खँ मयूर यातायातया अध्यक्ष मोहन बहादुर श्रेष्ठं कनादिल ।

कोटेश्वरं च्वय्या रुटय् गाडी चले याइपिं यातायात व्यवसायीतय्सं गामय् गाडी चले मयासे बांलाःगु रुटय् जक परमिट बिल धकाः उकिया विरोध याःगु खः । तर सरकारं मयूरयात गामय् नं चले याकेगु जुइ धासें थौंकन्हय् गांया रुटय् गाडी चले याइपिंसं नं सेवा बीगु स्वयां अप्वः लुटे जक यानाच्वंगु द्वपं बिउगु दु ।
यदि ख्वप–भोंत रुटया गाडी बन्द जुल धाःसा मेगु गाडी हयाःसां सेवा सञ्चालन यायेगु तयारी नं सरकारं यानाच्वंगु सीदुगु दु ।

सम्बन्धित बुखँ

LEAVE YOUR COMMENTS