सिन्डिकेट पनेत कडा व्यवस्था

येँ – यातायात व्यवस्था विभागं यातायात क्षेत्रय् वयाच्वंगु सिन्डिकेट अन्त्य यायेत थ्व सम्बन्धी कार्यविधि संशोधन यानाः कडा प्रावधानत हयागु खँ धाःगु दु । न्हूगु कार्यविधिइ सार्वजनिक सवारी साधन अनिवार्य रुपं यातायात व्यवस्था विभागय् दर्ता मयात धाःसा रुट इजाजत खारेज यायेगु व्यवस्था यानातःगु दु । थुकिं छुं छगू संघ वा समितिया सिफारिसय् रुट परमिट बीगु व्यवस्था खारेज जूगु खँ विभागं धाःगु दु ।व्यवसायीतय्सं सरकारं यकःति ढंगं न्हूगु कार्यविधि हःगु धासें थुकियात थःपिंसं माने मयायेगु धम्की बिउगु दु ।थ्वयां न्ह्यः विभागं सिडिओय् दर्ता दुगु यातायात संघ वा समितिया सिफारिसय् रुट परमिट बीगु याना वयाच्वंगु खः । तर आः थथे दर्ता जुयाच्वंगु स्वसलं मल्याक समितितय्त सवारी तथा यातायात व्यवस्थापन सम्बन्धी ऐनं म्हमसिउ धासें विभागं थज्याःगु समितिया सिफारिसय् रुट परमिट मवइगु खँ धाःगु दु ।संशोधित कार्यविधि कथं आवंलि विभागय् दर्ता जूगु कम्पनीया सार्वजनिक सवारीसाधनयात जक रुट परमिट बी ।

यातायात व्यवसायीतय्सं थःपिनिगु मातहतय् दुगु गाडी जक चले याकेबीगु, मेगु गाडी चले तकं याके मबिइवं विभागं कार्यविधिइ संशोधन याःगु खः । यातायात व्यवस्था विभागया महानिर्देशक रुपनारायण भट्टराईनं धयादीगु दु, ‘समिति मातहतय् दुगु जक गाडी चले याकेबीगु, मेगु गाडी निषेध यायेगु थेंज्याःगु ज्या समितितय्सं यानाच्वंगु दु । सरकारं अर्बाैं लगानी यानाः दयेकूगु सतकय् व्यवसायीतय्सं सिन्डिकेट लागू यानाच्वन, आः थुकियात बन्द यानाबियागु दु ।’न्हूगु कार्यविधिं दँय् छगू अर्बं मल्याक राजश्व नं राज्यया ढुकुटी दुहां वइगु खँ धाःगु दु । थुकिया लिसें न्हूगु कम्पनीतय्त नं प्रतिस्पर्धात्मक रुपं व्यवसाय यायेत अःपुइ । मेखे नेपाल यातायात व्यवसायी राष्ट्रिय महासंघया छम्ह उपाध्यक्ष रामप्रसाद सुवेदीं व्यवसायीतय् सहमति बिना हःगु थ्व नियम कार्यान्वयन जुइफइमखु धयादीगु दु । वय्कलं धयादीगु दु, ‘जिमिसं नं सरकारी निर्णय कथं, कानुन कथं हे गाडी चले यानाच्वनागु खः । छुं नं गाडी सरकारी नियम अःखः चले जूगु मदु । जिमिसं फुक्कं गाडी चले मयासें दिकाबिल धाःसा छु जुइ ?’ राजनीतिक संरक्षणया कारणं थज्याःगु यातायात समितितय्सं इलय् ब्यलय् सिन्डिकेट लागू याना वयाच्वंगु दु । थौंकन्हय् नं येँ नं बनेपा वनेगु रुटय् वःगु न्हूगु कम्पनी मयूर यातायातया बस चले याके मबियाच्वंगु दु । समितितय् थज्याःगु सिन्डिकेटया कारणं यात्रुतय्सं नं सुविधापूर्वक बस गये खनाच्वंगु मदु ।

सम्बन्धित बुखँ

LEAVE YOUR COMMENTS