शिकागो व उटाय् नं विश्व नेवाः दिवस हन

येँ – नेवाः अमेरिकन दबूपाखें नं विश्व नेवाः दिवसया लसताय् अमेरिकाया शिकागोय् छगू सांस्कृतिक ज्याझ्वः यासें तजिक हंगु खः । शिकागोया इभान्सटन लाइब्रेरीया सभाकक्षय् जूगु ज्याझ्वलय् आपालं सछि स्वयां अप्वःसिया सहभागिता दुगु खः ।
दबूया नायः उदय महर्जनया लसकुस न्वचुपाखें न्ह्याःगु ज्याझ्वलय् थीथी नेवाः म्येँ, प्याखं न्ह्यब्वयेगु ज्या जूगु खः । ज्याझ्वलय् इच्छा श्रेष्ठ, नूर महर्जन, रमा गोपाली, आयुषा सिंहं हुलाप्याखं न्ह्यब्वयादीगु खःसा विनय श्रेष्ठ व श्रवण श्रेष्ठं नेवाः म्येँ न्यंकादीगु खः । थ्व स्वयां न्ह्यः ज्याझ्वलय् ब्वति कायेत वःपिं सकलें पाहांपिनिगु म्हसीका बीगु नापं नेपाल लिपि च्वयेगु ज्या नं जूगु खः । नेपाल लिपि च्वयेगु ज्या मय्जु निभाः श्रेष्ठं यानादीगु खःसा श्रस्ता तायो ताम्राकारं ज्याझ्वलय् ब्वति कायेत वःपिं मस्तय्त फेस पेन्टिंग याकादीगु खः । ज्याझ्वलय् ब्वति कयादीपिं सकसितं समय्बजिया नं व्यवस्था यानातःगु उगु ज्याझ्वः सिम्रिकमान तुलाधर व मय्जु सनम महर्जनं न्ह्यइपुसे च्वंक न्ह्याकादीगु खः ।

अथे हे अमेरिकाया उटाह राज्यय् नं विश्व नेवाः दिवस छगू तःजिगु ज्याझ्वः यासें हन । सकलें नेवाःत छगू हे थासय् मुनाः थुकथं विश्व नेवाः दिवस हनेगु झ्वलय् वल्र्ड नेवाः अर्गनाइजेसनया मू दुजः राजीस श्रेष्ठं सान फ्रान्सिस्कों, नेवाः अमेरिकन दबूया पुलांम्ह नायः केशरमान ताम्राकार शिकागों व भौतिकशास्त्री नारायण ताम्राकार लस एन्जलसं झायादीगु खः ।
ज्याझ्वलय् भाजु राजीस श्रेष्ठं अमेरिकन भाजु क्रिस मायन्डर्सलिसे नेपालभाषां यानादीगु खँल्हाबल्हाया भिडियो क्यनेज्या यासें न्ह्याःगु ज्याझ्वलय् वय्कलं वल्र्ड नेवाः अर्गनाइजेसन गुकथं नीस्वनेगु ज्या जुल धाइगु बारे जानकारी बियादीगु खः ।
अथे हे भाजु केशरमान ताम्राकारं झी नेवाःतय्गु पहिचान धइगु हे झीगु भाय् खः धासें नेवाःतय्सं नेवाः भाय् ल्हाये माःगु खँय् बः बियादिल । लिसें वय्कलं दबूपाखें पिथना वयाच्वंगु शिकागो नेवाः दबू ल्याः ७ व संकल्प उपन्यास नं ज्याझ्वलय् ब्वति कायेत झायादीपिंत इना बियादीगु खः । उगु ज्याझ्वः उटाहय् च्वनादीपिं भाजु प्रसय व मय्जु रिष्णा श्रेष्ठया निवासय् जूगु खःसा वय्कःपिंसं पाहांपितं समय्बजिया नं व्यवस्था यानादीगु खः ।

सम्बन्धित बुखँ

LEAVE YOUR COMMENTS