विश्वकप २०१८

मलाला कडा सुरक्षा दथुइ गृहनगरय्

नोबेल शान्ति पुरस्कार त्यादीम्ह पाकिस्तानी अधिकारवादी मय्जु मलाला युशुफजाइ कडा सुरक्षा दथुइ थःगु गृहनगर झायादीगु दु । थ्वयां न्ह्यव वय्कः थःगु गृहनगर स्वात उपत्यकाय् वनी कि वनीमखु धयागु सीमदुयाच्वंगु खः ।तालिवानतय् धम्कीया कारणं वय्कःयात कडा सुरक्षा बिउगु खः । खुदँ न्ह्यव तालिवानतय्सं मलालायात गोली कयेकाः स्यायेगु कुतः याःगु खः ।मिसा मस्तय्त नं आखः ब्वंकेमाः धयागु पक्षय् न्ववाना वयाच्वंगुलिं तालिवानतय्सं मलालायात गोली कयेकूगु खः । मलालायात पाकिस्तानया स्वात उपत्यकाय् गोली कयेकूगु खः । अनं वय्कःयात उपचारया निंतिं बेलायत यंकूगु खःसा आःतिनि हे जक पाकिस्तान लिहां वःगु खः । बेलायतय् उपचार लिपा अन हे च्वनाः मिसा मस्तय्त शिक्षा बीगु निंतिं वय्कलं जनचेतना न्यंका वयाच्वंगु खः । गोली कयेकेधुंकाः न्हापांखुसी पाकिस्तान थ्यंम्ह मलालां थः पाकिस्तानय् हे च्वनाः मिसा व मस्तय् अधिकारया क्षेत्रय् ज्या यायेगु इच्छा दुगु खँ धयादीगु दु । वय्कलं पाकिस्तानी प्रधानमन्त्रीया लिसें उच्चपदस्थ नेतातय्त नापलाइगु ज्याझ्वः नं दु ।मलालाया नामय् ‘मलाला फण्ड’ धकाः थौंकन्हय् छगू गैरसरकारी संस्था चायेकातःगु दु । थ्व हे संस्था मार्फत पाकिस्तानय् मिस्तय् शिक्षाया निंतिं ज्या जुया वयाच्वंगु दु ।

सम्बन्धित बुखँ

LEAVE YOUR COMMENTS