विश्वकप २०१८

खुला दुने विकास खर्च १३ प्रतिशत जक

येँ (नेपालभाषा टाइम्स)-  चालु आर्थिक दँया खुला पूवनेत्यंगु इलय् विकास बजेट धाःसा मुक्कं १३ प्रतिशत जक खर्च जूगु दु । स्थानीय तहया निंतिं फ्यानातःगु रकम खर्च जुइमफुगुलिं पूँजीगत खर्च नं म्हो जूगु खँ अर्थ मन्त्रालयया अधिकारीतय्सं धाःगु दु ।

अर्थ मन्त्रालयया अधिकारीतय्सं थुकिया द्वपं स्थानीय तहयात बिउसां न्हापांनिसें हे सरकारं विकास बजेट खर्च याये मफया वयाच्वंगु दु । अर्थविद्तय्सं आःतक सुं नं सरकारं विकास बजेट बांलाक खर्च यायेमफुगु धासें सरकारयाके विकास बजेट खर्च यायेगु क्षमता हे मदु धाःगु दु । थुकिया लिसें खर्चया अनुगमन यायेगु निकाय तकं बांलाःगु मदुगु खँ अर्थविद्तय्सं धायेगु याना वयाच्वंगु दु ।

चालु आर्थिक वर्षय् विकास खर्च जक ३ खर्ब ३५ अर्ब फ्यानातःगु दु । तर आर्थिक दँ क्वचायेत खुला जक ल्यंदनिबलय् मुक्कं १३.५९ प्रतिशत जक विकास बजेट खर्च जूगु दु ।
अर्थसचिव शंकरप्रसाद अधिकारीं वइगु न्हिलय् विकास बजेट प्रभावकारी रुपं बांलाक खर्च यायेगु निंतिं सरकारं योजना दयेकेधुंकूगु खँ धाःगु दु ।

वय्कलं धयादीगु दु, ‘चुनाव जुल, अले स्थानीय तहय् एकमुष्ठ बिउगु रकम खर्च जुइ फयाच्वंगु मदु ।उकिं नं विकास बजेट खर्च जुइमफुत । आः जिमिसं पुँजीगत खर्चया अख्तियार बियातयागु मन्त्रालय, विभागयात थ्व खर्च माघ मसान्त दुने खरिद प्रक्रियाय् मवन धाःसा अज्याःगु बजेट लित हयाः रकमान्तरन यानाः खर्च यायेगु जुइ ।’ न्हापा न्हापा नं विकास खर्च इलय् हे मजुइगु जूगुलिं सरकारं निदँ न्ह्यवनिसें आर्थिक वर्ष सुरु जुइगु लत्या न्ह्यव हे बजेट हयेगु सुरु याःगु खः । थ्व ल्याखं निदँ न्ह्यवनिसें जेठ १५ गते हे बजेट पितबिइगु याःसां खर्च यायेगु क्षमता अप्वयेकेमफुगुलिं पूँजीगत खर्च बांलाक याये फयाच्वंगु मदुनि ।

अर्थविद् केशव आचार्यं विकास खर्चयात महत्व मबिउगुलिं हे सरकारी धुकुतिइ ध्यबा थानाच्वंगु खँ धयादीगु दु । बिबिसीलिसे खँ ल्हासें वय्कलं धयादीगु दु, ‘२०७२ सालय् भुखाय् ब्वल, व धुंकाः नाकाबन्दी जुल । आः चुनाव जुल । सरकारं न्ह्याबलें पूँजीगत खर्च जुइमफुगु कारण थीथी बाहाना क्यनाच्वंगु दु । राष्ट्रिय योजना आयोग, प्रधानमन्त्री व मन्त्रिपरिषद्या सचिवालयपाखें अनुगमन, मूल्यांकन व सुपरिवेक्षण यायेगु ज्या शून्य हे दु । उकिं चालु खर्च धाःसा जुया हे च्वनीगु विकास खर्च धाःसा मजुइगु जुयाच्वंगु दु ।’

चालु आर्थिक दँया खुला पूवनेधुंकाः नं बांलाक विकास खर्च मजूगुलिं आर्थिक दँ क्वचायेत्ययेकाः न्हापा न्हापा थें लाक्वपाक्व रुपं खर्च अप्वइगु प्रवृत्ति थ्व दँय् नं खनेदइगु हे जूगु दु । थथे जुल धाःसा भ्रष्टाचारया सम्भावना अप्वइगु व ज्याया गुणस्तर नं मदइगु खँ अर्थविद्तय्सं धया वयाच्वंगु दु ।

सम्बन्धित बुखँ

LEAVE YOUR COMMENTS