युएई नं नेवाः दिवस हन

युएईस्थित अजमानय् नेवाः पुचः युएईं म्हिगः विश्व नेवाः दिवस न्यायेकल । नेवाः पुचःया अध्यक्ष लक्ष्मण श्रेष्ठया सभापतित्वय् जूगु उगु ज्याझ्वलय् तमु, तामाङ्ग समाज लिसें एनआरएन युएईया नायःपिंसं नं ब्वति काःगु खः ।

ज्याझ्वलय् युएईया अबुधावी, अजमान व शारजाहलय् च्वंपिं नेवाः मिसापिंसं दयेकाहःगु नसा ज्वलं तयाः समय्बजि नयेगु ज्या नं जूगु खः । लिसें लाखे प्याखं लिसें थीथी नेवाः हुलाप्याखं नं प्रस्तुत याःगु खः ।

ज्याझ्वलय् पुचःया न्वकु राजेश प्रधान, विशेष सल्लाहकार प्रमोद श्रेष्ठपिंसं थःथःगु नुगःखँ तसें नेवाःतय्सं थःगु अधिकार कायेगु खःसा राजनीतिक रुपं नं न्ह्यःने वने माःगु बिचाः तयादीगु खः । वक्तातय्सं थःपिं विदेशय् खःसां नं थःगु देश व थःगु संस्कृति ल्वःमंकेत इनाप यानादिल ।

येँय् विश्व नेवाः दिवस हनाच्वंगु हे इलय् विश्वया मेमेगु नं देशय् थीथी ज्याझ्वः यानाः नेवाः दिवस हनेगु ज्या जूगु खः । गुलिखे देशय् थौं नं नेवाः दिवस हनाच्वंगु दु ।

सम्बन्धित बुखँ

LEAVE YOUR COMMENTS