सतक विस्तारविरुद्ध संयुक्त राष्ट संघ, अमेरिकी कंग्रेसय् उजुरी तयेमाःसां तयार
येँ – नेवाःतय्त विस्थापित यायेकथं जुयाच्वंगु सतक विस्तारविरुद्ध संयुक्त राष्ट संघ, अमेरिकी कंग्रेसय् उजुरी तयेमाःसा तयार दुगु खँ धाःगु दु । विश्व नेवाः सम्मेलन उलेज्याझ्वलय् न्ववानादिसें विश्व नेवाः संगठन (वल्र्ड नेवाः अर्गनाइजेशन)या अध्यक्ष सिजन श्रेष्ठं नेवाःतय्त जुयाच्वंगु अत्याचार विरुद्ध संरासं, अमेरिकी कंग्रेस, युरोपेली कंग्रेस न्ह्याथाय् वनेत नं थःपिं तयार दुगु खँ धयादीगु खः ।
गैरन्यायायिक ढंगं जुयाच्वंगु सतक विस्तार विरुद्ध वंगु बुधवाः जूगु शान्तिपूर्ण प्रदर्शनय् राज्यसत्तां याःगु दमनया सन्दर्भय् न्ववानादिसें भाजु श्रेष्ठं धयादीगु दु, ‘विश्वया नेवाःत आः छप्पँ जुया वयेधुंकूगु दु । उकिं नेवाःतय्त जुयाच्वंगु अन्यायविरुद्ध संरासं जक मखु, अमेरिकी कंग्रेस, युरोपेली कंग्रेस वनेमाःसां सक्षम दु ।’
नेवाःत विकास विरोधी मखु, तर विकासया नामय् नेवाःतय्त विस्थापित यायेगु, नेवाः सम्पदा न्हंकेगु धयागु विकास मखु विनाश जक खः धासें वय्कलं राज्यं सचेत जुयाः ज्या यायेमाः धयादीगु दु ।
विश्वन्यंकंया नेवाःत छप्पँ यायेगु आज्जु तयाः वल्र्ड नेवाः अर्गनाइजेशनं ज्या याना वयाच्वंगु खँ न्ह्यथँसें अध्यक्ष भाजु श्रेष्ठं थ्व उद्देश्य चूलाकेगु निंतिं विश्व नेवाः सम्मेलनया ग्वसाः ग्वयागु खँ धयादिल ।
ज्याझ्वलय् न्ववानादिसें नेवाः न्ह्यलुवाः मल्ल के सुन्दरं विश्वन्यंकं नेवाःतय् हाः धयागु नेपालय् च्वनाच्वंपिं नेवाःत खः धयादिसें सिमाया हाः बमलाकं हः जक बल्लानाः मजिउ धयादिसें नेपालय् च्वंपिं नेवाःतय्त बल्लाकेगु निंतिं विश्वय् न्यना वनाच्वंपिं नेवाःतय्सं तिबः बीमाः धयादिल ।
ज्याझ्वलय् मू वक्ता कथं न्ववानादिसें लुम्बिनी विश्वविद्यालयया उपकुलपति प्रा. त्रिरत्न मानन्धरं गलत शिक्षा नीतिया कारणं हे नेवाःभासं आखः ब्वनीपिं मदयावंगु खँ धयादिसें संघीय नेपाःया शिक्षा नीति हिलाः अनिवार्य नेपालीयात ५० पूर्णांक जक बियाः मेगु ५० पूर्णांकय् मांभासं आखः ब्वनेगु व्यवस्था यायेमाः धयादिल ।
वय्कलं नेवाःत हे न्हनावनीगु अवस्था दु धासें नेवाःतय्त ल्यंकातयेगु निंतिं बुँदागत रुपं सुझाव बियादिसें छेँय् मांअबुं मस्त नाप नेवाः भासं खँ ल्हायेमाःगु, शिक्षा नीतिइ हिउपा हयेमाःगु, प्रदेश नं. ३या नां नेपाल मण्डल तयेमाःगु लिसे थीथी सुझाव बियादीगु खः ।
अथेहे सांसद राजेन्द्र श्रेष्ठं नेवाःत बुलुहुं विस्थापित जुया वनाच्वंगु अवस्थाय् आः संघीय नेपाः जुइधुंकूगु न्हूगु लसकय् झी गन दु, झीगु थाय् गये यानाः काये फइ धयागु खँय् सहलह याना वनेमाःगु बिचाः प्वंकादिल । अथेहे वय्कलं ‘सतक विस्तारया नामय् जुइमा वा मेगु न्ह्यागु कथं जुइमाः नेवाःतय्त विस्थापित यायेत कुतः जुया वयाच्वंगु दु । थुकिया विरुद्ध बुलुहुं नेवाःत दना वयाच्वंगु दु । न्हूगु लकसय् थ्व बांलाःगु संकेत खः’ धयादिसें झीगु निंतिं झी हे ल्वायेमाः धयागु भावना ब्वलंकेमाः धयादिल ।
ज्याझ्वलय् डब्ल्यूएनओया सल्लाहकार पद्मरत्न तुलाधर, माणिक लाल श्रेष्ठ, शताब्दी पुरुष सत्यमोहन जोशीयात नं हनेज्या याःगु खः ।
शताब्दी पुरुष जोशीं उलेज्या यानादीगु ज्याझ्वलय् डब्ल्यूएनओया लुमन्ति पौ, डब्ल्यूएन ओया पुलांम्ह नायः डा. बालगोपाल श्रेष्ठं अनुवाद यानादीगु चिनिया कवि लु सुनया कविता सफू नं मूपाहाँ लिसें पाहाँपिं माणिकलाल श्रेष्ठ, लक्ष्मीदास मानन्धर, चित्तरञ्जन नेपाली, प्रा. त्रिरत्न मानन्धर, मल्ल के सुन्दर, पद्मरत्न तुलाधरपिंसं विमोचन यानादीगु खः ।
डब्ल्यूएनओया नायः सिजन श्रेष्ठया सभपातित्वय् जूगु ज्याझ्वलय् विश्व नेवाः सम्मेलन ज्याझ्वःया संयोजक दया शाक्यं ज्याझ्वः बारे न्ववानादीगु खःसा प्रवक्ता कृष्ण चुखं नं सुभाय् देछायादीगु खः । ज्याझ्वलय् येँ महानगरपालिकाया मेयर विद्यासुन्दर शाक्य, नेवाः देय् दबूया नायः नरेश ताम्राकार, नेपालभाषा केन्द्रीय विभागया प्रमुख सिर्जना प्रधान, प्रा. प्रेमशान्ति तुलाधरपिंसं सम्मेलन तःजिक सुथां लाक्क न्ह्यायेमा धकाः भिंतुना देछायादीगु खः ।
झिंखुगू देय्या प्रतिनिधिपिंसं ब्वति काःगु सम्मेलनय् उलेज्या लिपा थीथी विषयय् ज्यापौ न्ह्यब्वःगु खः ।
प्रज्वलरत्न वज्राचार्यं स्वस्ति वाचन यानाः सुरु जूगु ज्याझ्वलय् चर्चा प्याखं नं न्ह्यब्वःगु खः । चर्चा प्याखंया निंतिं स्वयम्भूरत्न वज्राचार्यं चचा हालादीगु खः । अथेहे ज्याझ्वलय् दुर्गालाल श्रेष्ठं च्वयादीगु लसकुस म्येँ नं हाःगु खः ।
सम्मेलन कन्हय् नं न्हिछियंकं नेवाः ब्यांक्वेट खुसिबुँइ न्ह्याइ । कन्हय् नं थीथी ज्यापौ न्ह्यब्वसें सहलह याइगु ज्याझ्वः दु ।
LEAVE YOUR COMMENTS