विश्वकप २०१८

मिसाइल आक्रमणया गलत सुचं वःगुलिं क्षमा फ्वन

अमेरिकाया हवाई राज्यया गभर्नर डेभिड इगेइ थन मिसाइल आक्रमण जुइत्यन धकाः वंगु गलत सन्देशयात कयाः क्षमा फ्वना दीगु दु । छम्ह कर्मचारीं थःगु ज्या क्वचायेत्ययेकाः गलत बटन तियाबिउगुलिं गलत सुचं वंगु धासें गभर्नरं क्षमा फ्वंगु खः ।
शनिवाः सुथय् ८ बजे पाखे वंगु थ्व सन्देशं यानाः हवाइया स्थानीय मनूतय्त धाःसा तसकं तनाव यानाबिउगुृ खः । शनिवाः सुथय् मोबाइल, रेडियो व टेलिभिजनय् वःगु सन्देशय् धयातःगु खः, ‘ब्यालेस्टिक मिसाइल हवाइपाखे न्ह्याः वयाच्वंगु दु । आपतकालिन थासय् झायादीत इनाप याना । थ्व अभ्यास मखु ।’
क्षेप्यास्त्र परिक्षण यानाच्वंगु उत्तर कोरिया पाखें दकलय् सतिक लाःगु हवाई जूगुलिं थन उत्तर कोरियां आक्रमण यायेफु धकाः थज्याःगु सतर्कता प्रणाली तयातःगु खः ।
ततःग्वःगु आखलं च्वयातःगु सन्देश स्थानीय ई कथं सुथय् ८ बजे जुयाः ७ मिनेट वंबलय् छ्वःगु खः । तर थ्वयां १८ मिनेट लिपा हे हाकनं उगु सन्देश गलत जूगु धकाः इमेल छ्वःगु खः । तर मोबाइलय् धाःसा ४० मिनेट लिपा जक सन्देश वंगुलिं अप्वः थें मनूत अलमलय् लाःगु खः ।
आक्रमणया सन्देश वयेवं गुलिखे मनूत गल्लीपाखे बिसिउँ वंगु खःसा गुलिसिनं शहर त्वःतेत अनियन्त्रित रुपं गाडी ब्वाकूगु खः, गुलिं धाःसा छेँय् हे सुरक्षित क्वथाय् च्वनेगु तयारी याःगु खः ।
– एजेन्सी

सम्बन्धित बुखँ

LEAVE YOUR COMMENTS