गुल्मीया नेवाःतय् संस्थाया निंतिं जग्गा

येँ (नेपालभाषा टाइम्स) – गुल्मीया नेवाःतय् छगू संस्थां दयेकेत्यंगु देगः व भवनया निंतिं निम्हेसिनं जग्गा दान याःगु दु । गुल्मीया वामीइ च्वनाच्वंपिं नेवाःतय् संस्था नेवाः बर्जु पुचलं दयेकेत्यंगु देगःसहितया भवनया निंतिं जग्गा दान याःगु खः ।
अनया नेवाः संस्था दयेकेत्यंगु संरचनाया निंतिं गुल्मीया मुसिकोट नगरपालिका वडा नं. ७ या मोहनलाल श्रेष्ठ व मनोज श्रेष्ठं मंकाःकथं मुसिकोट नगरपालिकाया उगु हे वडाय् च्वंगु निपी जग्गा निःशुल्क रुपं बियादीगु खः । वडा नं. ७ स्थित इस्मालीथानय् च्वंगु निपी जग्गा श्रेष्ठद्वयं देगःसहितया भवन निर्माणया निंतिं बियादीगु नेवाः बर्जु पुचःया दांभरिं चिरञ्जीवी शाक्यं कनादीगु दु ।
उगु जग्गाय् नेवाः संस्कृति व कला कौशलता पिज्वइकथं उगु भवन निर्माण याये अन च्वंपिं नेवाःतय्सं नेवाः संस्कृति दुनेया इहि, कय्तापुजा, इहिपा लगायत छुं नं लसता भ्वय् न्यायेकेत सहज जुइगु वय्कलं कनादीगु दु ।
गुल्मीइ च्वंपिं नेवाःतय् उगु संस्थाया थःगु कला, संस्कृति व परम्परा, रीतिरिवाज च्वयान्ह्याकेगु ज्याय् सक्रिय जुयाच्वंगु दु । पुचःया हे सक्रियता व नेतृत्वय् नेवाःतय् थीथी कला, संस्कृति व झाँकीसहितया प्रदर्शन इलय् व्यलय् यायेगु याना वयाच्वंगु दु ।
संस्थाया निंतिं प्राप्त जग्गाया रजिष्ट्रेशन पास यानाः याकनं भवन निर्माणया ज्या नं न्ह्याकेगु व भवन निर्माण लिपा नेवाःया कला, संस्कृति, परम्परा आदियात च्वन्ह्याकेत अझ थप ग्वाहालि जुइगु संस्थां विश्वास याःगु दु ।

सम्बन्धित बुखँ

LEAVE YOUR COMMENTS