विश्वकप २०१८

विश्वया नेवाःत छथाय् च्वनेगु ह्वःताः

विश्व नेवाः सम्मेलनया मू ग्वसाः खलः वल्र्ड नेवाः अर्गनाइजेशन (डब्लुएनओ) खःसा उकिया लिउ ग्वसाः खलः धाःसा डब्लुएनओ नेपाः च्याप्टर व नेपालभाषा केन्द्रीय विभाग, पाटन क्याम्पस खः । थुकी नेपालभाषा केन्द्रीय विभागं सम्मेलनया लागिं लुमंति पौ पिकायेगु भाला काःगु दुसा नेपाः च्याप्टरं सम्मेलनया व्यवस्थापन सम्बन्धी ज्याया जिम्मा काःगु दु । सम्मेलनया व्यवस्थापन व उकी जुइगु सहभागितायात कयाः नेपाः च्याप्टरया थौंकन्हय् कार्यवाहक नायः शाक्य सुरेनलिसे यानागु खँल्हाबल्हा थन न्ह्यब्वया ।

व्यवस्थापनया तयारी गथे जुयाच्वन ?
तयारी ला फुक्कं क्वचाल धाःसां जिल । थ्व विश्व नेवाः दिवस धाःसां पिने जुलुस, ¥याली आदि पिकयाः तामझामपूर्वक याये माःगु ज्या मखु । थ्व छगू हल दुने बौद्धिक मनूत मुनाः हनेत्यनागु बौद्धिक ज्याझ्वः खः । उकिं व्यवस्थापन धकाः उलि झ्यातुक यायेमाःगु खास ज्या मदु । ज्याझ्वःया उलेज्या धाःसा फयांफछि अप्वः सहभागी जुइ कथं यायेगु ताः तयातइगु दु ।

धायेबलय् थ्व सम्मेलनं गज्याःगु समाधान पिकाइगु आशा यायेफइ ?
विश्वव्यापी सम्मेलन धाःगुलिं थ्वपाखें तःधंगु आशा काइगु नं स्वाभाविक खः । तर आःयात थ्वपाखें तःधंक हे छुं हिउपाः हइ धकाः आशा काये जी मखुनि । आःया लागिं ला विश्वन्यंकंया नेवाःत छथाय् च्वनाः समस्या बारे सहलह यायेत्यनागु दु । खतुं प्रविधिया सुविधा कयाः झी न्हापा स्वयां यक्व सतिक च्वनेगु ज्या ला याना हे च्वनागु जुल । झी नेवाःत छगू त्वाः तकं हे नापं च्वनाः ज्या याये मसःपिं धकाः नं गनं गनं द्वपं बीगु याः । तर धाथें ला झीपिं विश्वव्यापी रुपं हे नापं च्वने सःपिं खः धकाः क्यनेगु ज्या नं थ्व सम्मेलनं याइ ।

थ्व नापं च्वनाया उपलब्धी छु जुइ फइ ?
जिं खनाच्वनागु ला छु धायेबलय् झी स्वनिगलय् च्वंपिं नेवाःतय्के दुगु क्षमता व सम्भावना धइगु बिस्कं हे दु । अले नेपालं पिने च्वंपिं नेवाःतय्के दुगु क्षमता व सम्भावना बिस्कं हे दु । थ्व निगू क्षमता व सम्भावनायात छथासं तयाः फ्युजन याये फत धाःसा उकिं छगू तःधंगु उपलब्धी चूलाके फइ । थ्व खँयात झीसं मनन् यायेमाः थें च्वं ।

लिउ ग्वसाः खलःया ल्याखं छुं इनाप यायेमाःसा छु धयादी ?
झीथाय् नेपालय् न्हापांखुसी नेवाःतय् बारे नेवाःतय्सं हे थज्याःगु अन्तर्राष्ट्रियस्तरया सम्मेलन यायेत्यंगु दु । थ्व झी सकले नेवाःतय् लागिं लसताया खँ खः । थुकियात झीसं फयांफछि सफल याना बीमाः । तयारीया ज्याय् अवश्य नं छुं मगाःमचाः जूगु दयेफु । विदेशय् च्वंपिं नेवाःतय्सं ब्वति काः वःसां नेपाः दुने हे थीथी जिल्लाया नेवाःतय्त थुकी दुथ्याके मफुनि । अथे खःसां सम्पूर्ण नेवाःतय् समग्र पक्षयात कयाः सम्मेलनय् सहलह अवश्य जुइ ।

सम्बन्धित बुखँ

LEAVE YOUR COMMENTS