विश्वकप २०१८ फाइनल

बिस्काः जात्राया रथ दयेकेगु शुरु

ख्वप – थनया दकलय् ताःहाकःगु बिस्काः जात्राया तयारी शुरु जूगु दु । च्याचा गुन्हुतक न्यायेकीगु बिस्काः जात्राया तयारी तीव्र रुपं जुयाच्वंगु दु । बिस्काःया निंतिं भैरव व भद्रकालीया रथ निर्माण यायेगु ज्या शुरु जुइ धुंकूगु दु । अथे हे बिस्काःया झ्वलय् थनीगु यःसिं नं भेलुख्यःया यःसिंख्यलय् थ्यंकः हयेधुंकूगु दु । उगु यःसिं स्वंगू लाख नीखुद्वः तका दां खर्च यानाः हयागु गुथि संस्थान ख्वपं जानकारी बिउगु दु । उगु यःसिं सूर्यविनायक नगरपालिकाया चित्तपोलय् च्वंगु सल्लाघारीं हइगु खः ।
वइगु चैत २७ गते निसें बैशाख ५ गतेतक न्यायेकीगु ख्वपया हे दकलय् ताःहाकःगु जात्राया निंतिं तौमधि त्वाःस्थित न्यातपौं देगः न्ह्यःहे प्यागोडा शैलीया भैरव व भद्रकालीया रथ निर्माण यायेगु ज्यानं शु जुइधुंकूगु संस्थाया ख्वप जिल्ला प्रमुख हरिप्रसाद सुवेदीं कनादीगु दु । सौर्यमासकथं न्ह्याइगु थुगु जात्रा वि.सं. या न्हूदँ शुरु जुइ प्यन्हु न्ह्यः तान्त्रिकविधिकथं शुरु यानाः बैशाख ५ गते भैरव व भद्रकालीया रथ सालाः क्वयेकीगु परम्परा दु ।

रथया च्वय्या तँ त्वःधूगुलिं रथ जीर्ण जूसां थुगुसी धाःसा व हे रथं ज्या काइगु जूगु दु । रथ मर्मतया निंतिं आवश्यक सिं इलय् थ्यंकः मवःगुलिं पुलांगु हे रथयात सामान्य मर्मत यानाः सालेगु तयारी जुयाच्वंगु खः । थ्व हे झ्वलय् जात्रायात व्यवस्थित यायेत नापं अप्पां कयेके मबीगु व हिंसा जुइगुपाखें बचे यायेगु ल्याखं थुगुसी नं जात्रा जुइगु थीथी थासय् सीसीटीभी क्यामरा जडान याइगु जुयाच्वंगु दु । जिल्लाया प्रमुख जिल्ला अधिकारी द्रोण पोखरेलया नेतृत्वय् वंगु छुं दिं न्ह्यः जक जात्रायात शान्तिपूर्ण रुपं सम्पन्न यायेत राजनीतिक दलया प्रतिनिधि, जात्रालिसे सम्बन्धित स्थानीय व्यक्ति, जिल्लाया सुरक्षा निकायया प्रमुखलिसें जात्रालिसें सरोकार दुगु ज्याकूया प्रतिनिधिपि दुथ्याःगु छगू बैठकं रथ जात्रा जुइगु लँपु चिहाकः यायेगु निर्णय याःगु दु । विशेष यानाः थ्व जात्रा शुरु जुइगु न्हि व दकलय् लिपांगु न्हि रथ सालेगु झ्वलय् थःने व क्वःनेया च्वंपिनिगु दथुइ रथयात थःथःगु थासय् सालेगु झ्वलय् अप्पां तकं कयेकाः ल्वापु जुगु खः । थुकथंया ज्या पनेत हे सीसी क्यामरा जडान यायेगु तयारी जुयाच्वंगु खः । थगुने बिस्काःया निंतिं नीप्यंगः सीसी क्यामरा जडान याःगु खःसा थुगुसी आवश्यक जूसा मेमेगु थासय् नं सीसी क्यामरा जडान यायेगु तयारी यानागु प्रजिअ पोखरेलं कनादीगु दु । थ्व हे झ्वलय् मध्यपुर थिमिया जात्रायात व्यवस्थित यायेत मध्यवपुर नगरपालिका थः हे सक्रिय जूगु दु । नगरपालिका प्रमुख मदनसुन्दर श्रेष्ठया नेतृत्वय् आः नकतिनि जात्रायात व्यवस्थित रुपं सम्पन्न यायेत छगू सहलह नं जूगु खः ।

सम्बन्धित बुखँ

LEAVE YOUR COMMENTS