विश्वकप २०१८

स्वनिगलय् आप्रवासन समस्या

स्वनिगःया येँ देय् देय्या राजधानी नं जूगुलिं देय्न्यंकंया नेपाःमित येँय् वयेगु याइ । धायेगु खःसा नेपाः देय्या थीथी थाय्या नेपाःमि जक मखुसें जःलाखःला देय्या मनूत तकं यक्वं नेपाः वयेगु यानाच्वंगु खनेदु । येँय् नेपाःया राजधानी जूगुलिं थन यक्व सुविधा दइ । देय् सुविधा सम्पन्न जुइ धकाः नं मनूत वयेगु याइ । गुलिखे लजगाःया लागिं वयेगु याइसा गुलिं थीथी ज्याय् नं वयेगु याइ । जःलाखःला देशं अप्वः यानाः लजगाःया लागिं थन वयेगु यानाच्वंगु खनेदु । थुकिं यानाः लिपांगु इलय् स्वनिगः दुने सुविधा स्वयां नं समस्या अप्वः जुयाच्वंगु दु । थुकी मध्ये दकले अप्वः खने दयाच्वगु समस्या आप्रवासनया समस्या खः । थुकिं यानाः स्वनिगःया आदिवासीतय्त यक्व समस्या जुयाच्वंगु दु । तर सरोकारतय्सं धाःसा थुखेपाखे ध्यान बियाच्वंगु मदु ।

येँ देसय् मनूत थुलि अप्वः जुल कि गुलिखे थासय् ला लँय् जुइबलय् न्याये हे वनेम्वाः । घ्वानाः जक थ्यनीगु जुइधुंकल । स्वनिगलय् अप्वयाच्वंगु आ¦वासन अप्वयाः थीथी समस्या ब्वलनाच्वंगु दु । अथेला गन जनसंख्याया चाप अप्वः जुइ अन थीथी समस्या वइगु स्वाभाविक हे खः । स्वनिगलय् नं लःया, धःया, फोहरया, ट्राफिक जामया, पार्किङया नापं महंगीया नं समस्या अप्वया वयाच्वंगु दु । मेलम्चीया लः येँय् वइ धाःगु नं नीखुदँ दयेधुंकल । अय्नं वःगु चाहिं मखुनि । अथेहे गन मनू अप्वः जुल अन फोहरया समस्या वइगु नं सामान्य खँ खः । आप्रवासनं यानाः स्वनिगलय् फोहर ब्यवस्थापन यायेत नापं थाकुयाच्वंगु दु । अथेला लिपांगु इलय् जन प्रतिनिधिपिं दुगुलिं येँय् देय् भचा सफा जुयाच्वंगु दु धाःसां जिउ ।

येँ देय्या मेगु समस्या धइगु ट्राफिक जामया समस्या खः । येँ देय्या मू सतकय् जक मखुसें बजाः दुने दुनेया सतक गल्लिइ नापं जामया समस्या तच्वयाच्वंगु दु । थाय्थासय् जुइगु जामं यानाः इलय् थःगु गन्तब्यय् थ्यंके फयाच्वंगु मदु । ट्राफिक जामया समस्यायात सरोकारवालातय्सं बांलाःक ब्यवस्थापन याये फयाच्वंगु मदु । स्वनिगलय् अप्वयाच्वंगु मोटरगाडीया चापं ट्राफिक जामया समस्या अप्वया वयाच्वंगु खः । गबलें गबलें राष्ट्रपति व प्रधानमन्त्रीया सवारी जुइबलय् नं नागरिकतय्त समस्या यानाच्वंगु दु । थ्व फुक्कं खने दयाच्वंगु समस्या धइगु स्वनिगलय् अप्वयाच्वंगु आप्रवासनया समस्या हे खः धाःसां जिउ । स्वनिगलय् लः, धः, फोहर, ट्राफिक जाम, पार्किङ व पसलय् जक समस्या ब्वलनाच्वंगु मखुसें थुकिं विकृति विसंगति नं अप्वयाच्वंगु दु । गुलिखे नेवाःतय्सं ला येँ देसय् नेवाःत च्वनेत नापं लायक मजुइधुंकल धकाः नापं धायेगु यानाच्वंगु दु । तर नेपाःया नेतात धाःसा देसय् खने दयाच्वंगु समस्यायात ज्यंकेगु स्वयां नं चन्द्रमाय् रकेट त्वतेगु भाषण यानाच्वंगु दु । स्वनिगलय् थ्वहे रफ्तारं आप्रवासनया समस्या अप्वया वनाच्वन धाःसा थुकिं लिपा भयावह रुप काइगु खनेदु । अय्नं थुकियात ब्यवस्थित यायेगु पनेगु लागिं सरोकारवालातय् भ्याः भतिचा हे ध्यान वंगु खनेमदु । अथे ला स्वनिगलय् अप्वया वयाच्वंगु आप्रवासनया समस्या अप्वयेकेगुली स्वनिगः दुनेया आदिवासीतय्गु नं ल्हाः मदुगु मखु । स्वनिगःया आदिवासी नेवाःतय्सं थःगु बुँइ अन्न सयेकेगु पलेसा छेँ दनेगु यानाच्वंगु दु । मेपिंत बालं तयेगु ज्या सयेकेगु यानाच्वंगु दु । अज्याःगु कथं आम्दानी यायेगु स्वभावया कारणं नं आः झन झन पिनेया मनूत थन वयेगु यानाच्वंगु खनेदु । आः थःपिंत च्वनेगु थाय् मदयेक तकं मेपिंत क्वथा बालं बीगु यानाच्वंगु दु ।

पिनं वयाः क्वथा छकू बालं कयाः च्वनाच्वंपिं डेरावालत आः संगठित जुयाः न्ह्याः वनाच्वंगु दु । तर येँया स्थानीय आदिवासीत धाःसा थःगु त्वाः बहाः व छेँ पिने च्वंपित बालं बियाः उखेंथुखें च्वनाः तितरबितर जुयाच्वंगु दु । डेरावालतय्सं छेँ थुवाःतय्त समस्या लाका हःगु खने दया वये धुंकल । बालं नये धकाः च्वंपिं नेवाःत छगः दां काये मखंक नं प्रहरीया चौकीइ थ्यनाच्वंगु दु ।

स्वनिगलय् अप्वया वयाच्वंगु आप्रवासनया समस्यायात क्वपालेगु खःसा स्वनिगःया आदिवासी नेवाःतय्त सचेत व सजग याये माःगु दु । विगतय् स्वनिगःया बुँइ अन्नबाली तरकारी सइगु खः । तर लिपांगु इलय् धाःसा तरकारी सइगु बुँइ छेँ सयाच्वंगु दु । विगतय् स्वनिगलय् तरकारी मीपिं थनया हे स्थानीय नेवाःत खः । आः मस्र्यात व पिनं वःपिं अप्वः जुजुं वनाच्वंगु दु । तरकारी जक मखु कि मेमेगु चीज मगिु ज्याय् नं अप्वः पिनेयापिं गैर नेवाःत हे जुयाच्वंगु दु ‘सुनदेखि नूनसम्म’ धाःथें । न्हापा न्हापा बुँइ तरकारी सयेकाः मेमेपिंत नापं नकीपिं नेवाः लिपांगु इलय् थम्हं साइकलवालातय्के तरकारी न्यानाः नयेगु यानाच्वंगु खनेदु । थौंकन्हय् प्याज छगःया लागिं नं विदेशीया भरय् च्वने मालाच्वंगु दु । खय्त ला थज्याःगु समस्या ब्वलंकेगु ज्याय् न्हापा न्हापाया येँ महानगरपालिकाया नं ल्हाः दु ।

स्वनिगःया अन्न तरकारी सइगु अधिकांश बुँत भूमाफियातय् ल्हातय् लाकाः प्लानिङ यानाः आवासीय थाय् दयेके धुंकूगु दु । येँया आपालं खुल्ला बुँयात जबर्जस्ती कयाः अन प्लटिङ यानाः पिनेयापिंत मीगु याना बिल । आप्रवासन समस्यायात थुकिं झन् अप्वयेका बिल । आः येँया अप्वः नेवाःत तितरबितर जुइ धुंकल । थः पुर्खाया थाय्बाय् त्वःताः उखें थुखें च्वं वनेगु यानाच्वंगु दु । थुकी थीथी कारण नं दइ । बाध्यता नं दइ । थुकिं यानाः गुलिं नेवाःतय्के ला थःगु थाय्बाय्, भाषा, कला, संस्कृति, सम्पदा अले थःगु नखः चखतय् थ्व झीगु खः धइगु भाव नापं म्हो जुजुं वनाच्वंगु दु । अथे ला झी नेवाःतय् त राजनीतिया चतुर गैर नेवाः खेलाडीतय् सं
म्हिताच्वंगु दु । अथेला राजनीतिइ नेवाःत नं मदुगु मखु । तर उपिं नेवाः समुदायया लागिं स्वयां नं थःगु दलीय  नेताया लागिं जक ज्या याइपिं जुयाच्वन । नेतातय्सं थुकी ध्यान मबिउगुलिं नेवाः कार्यकर्तातय्सं नं ध्यान बी मखनाच्वन, गुकिं यानाः आप्रवासन समस्या झन् झन् विकराल जुयाच्वंगु दु । आः लागू जुइगु संघीय व्यवस्थां थुकियात समाधान याइ ला धइगु आशा जुयाच्वंगु दु ।

सम्बन्धित बुखँ

LEAVE YOUR COMMENTS